Агляд прэсы: без шанцу на пасіўнасць
Час Лукашэнкі скончыўся: Беларусь павінна альбо ўступіць у вайну, альбо адмовіцца ад Пуціна. Краіны АПЕК+ знізілі аб'ёмы здабычы нафты. У Турцыі РНП патрабуе дакладных правілаў аб нашэнні хіджабу. Прэмія па літаратуры прысуджана Ані Эрно.
Artykuł Агляд прэсы: без шанцу на пасіўнасць pochodzi z serwisu БЕЛАРУСКАЕ РАДЫЁ РАЦЫЯ.
Час Лукашэнкі скончыўся: Беларусь павінна альбо ўступіць у вайну, альбо адмовіцца ад Пуціна. Краіны АПЕК+ знізілі аб’ёмы здабычы нафты. У Турцыі РНП патрабуе дакладных правілаў аб нашэнні хіджабу. Прэмія па літаратуры прысуджана Ані Эрно. Падрабязнасці свежых матэрыялаў замежнай прэсы ў аглядзе Вольгі Сямашкі.
«Верны саюзнік Пуціна Лукашэнка нядаўна паспрабаваў дыстанцыявацца ад эскалацыі вайны. Але яшчэ трэба пабачыць, як доўга Беларусь можа трымацца далей ад поўнага ўцягвання ў вайну Масквы. Рашэнне Крамля правесці псеўдарэферэндумы на акупаваных тэрыторыях Украіны і абвясціць частковую мабілізацыю канчаткова пазбаўляе Лукашэнку, як ключавога саюзніка Пуціна, магчымасці захаваць статус-кво», – папярэджвае міжнароднае выданне Worldcrunch.
«У дзень абвяшчэння расейскай мабілізацыі ў Маскве адбылася сустрэча сакратара Савета бяспекі Беларусі Аляксандра Вальфовіча і сакратара Савета бяспекі Расеі Мікалая Патрушава. Галоўнай тэмай, відавочна, была вайна і «напружанне» на межах як Беларусі, так і Расеі. Але ніякіх канкрэтных рашэнняў агучана не было, і любыя намёкі на магчымую мабілізацыю ў Беларусі тады былі адхіленыя. Апошнія падзеі сведчаць пра тое, што Пуцін, падобна, цвёрда настроены ціснуць на Лукашэнку. Мяркуючы па ўсім, Крэмль больш не збіраецца мірыцца з пасіўнай роляй Беларусі ў канфлікце з Украінай і некаторымі вольнасцямі афіцыйнага Менску ў знешняй палітыцы. Так ці інакш, для Лукашэнкі надыходзіць момант ісціны. Цяпер ён, мабыць, паспрабуе з усіх сіл цягнуць час, спадзеючыся, што Пуцін сам спыніць далейшую эскалацыю. Але калі Масква не адступіць, Лукашэнку хутка давядзецца прымаць рашэнне. Альбо ён зробіць рэзкі разварот у бок Захаду, рызыкуючы дэмаралізаваць сваіх саюзнікаў і справакаваўшы радыкальную рэакцыю Расеі, альбо яму давядзецца ўключыцца ў татальную вайну Пуціна, рызыкуючы ператварыць Беларусь у арэну баявых дзеянняў. Сёння верагоднасць апошняга сцэнара выглядае вышэй, чым калі-небудзь раней», – падкрэслівае міжнароднае выданне.
***
Арганізацыя краін-экспарцёраў нафты і яе неафіцыйны фармат АПЕК+, у які ўваходзіць і Расея, прынялі рашэнне скараціць здабычу нафты на два мільёны барэляў у дзень. Такім чынам нафтаздабываючыя краіны, якія ўваходзяць у гэты клуб, адрэагавалі на зніжэнне коштаў на нафту, якія праселі да рэкордна нізкай адзнакі за перыяд са студзеня гэтага года. Прэса напоўнена скепсісам, і перш за ўсё адносна таго, чым гэта абернецца ў палітычным плане. «Скарачэнне здабычы – вельмі сумнеўны крок, і Захад яму наўрад ці ўзрадуецца», – піша брытанскі часопіс The Economist.
«Рынкавая доля АПЕК + яшчэ не аднавілася пасля скарачэнняў, ажыццёўленых арганізацыяй у 2020 годзе для падтрымання коштаў на фоне падзення попыту. Далейшае зніжэнне аб’ёмаў здабычы можа яшчэ больш скараціць долю картэля на рынку. Цяперашні крок з’яўляецца таксама афронтам у дачыненні да прэзідэнта ЗША Джо Байдэна, які зусім нядаўна наведаў Саудаўскую Аравію, каб пераканаць Эр-Рыяд павялічыць здабычу нафты. Байдэн распачаў гэтую спробу напярэдадні няпростых прамежкавых выбараў у ЗША», – лічыць брытанскае выданне.
***
На фоне пратэстаў у Іране, дзе жанчыны спальваюць хіджабы, пытанне аб нашэнні гэтага галаўнога ўбору зноў стала адной з цэнтральных палітычных тэм у Турцыі. Так, старшыня Рэспубліканскай народнай партыі – найбуйнейшай апазіцыйнай сілы краіны – Кемаль Кылычдараглу запатрабаваў унесці папраўкі ў законы адносна права жанчын насіць або не насіць галаўны ўбор у грамадскіх месцах. Секулярная РНП раней заўсёды выразна выступала супраць рэлігійнай сімволікі ў грамадскіх установах. Як адзначае турэцкая газета Hürriyet, Кылычдараглу зрабіў прэзідэнту Эрдагану і яго Партыі справядлівасці і развіцця цудоўны перадвыбарчы падарунак.
«Эрдаган нагадаў пра даўнюю пазіцыю Рэспубліканскай народнай партыі ў дачыненні да забароны нашэння хіджабу ў грамадскіх установах, адмененай у 2013 годзе. Эрдаган скарыстаўся магчымасцю падкрэсліць свае намаганні па барацьбе за адмену гэтай забароны. У самы разгар эканамічнага крызісу Эрдаган паспяшаўся нагадаць грамадзянам кансерватыўных поглядаў, што праблема заключаецца не ў кошце на два кілаграмы памідораў, а ў «паляванні на хіджаб». Сапраўды, Эрдагану ёсць за што падзякаваць Кылычдараглу!», – адзначае турэцкае выданне.
***
Нобелеўская прэмія па літаратуры сёлета прысуджана Ані Эрно. Яна стала першай французскай пісьменніцай, ганараванай такой узнагародай. Нобелеўскі камітэт адзначыў «мужнасць і клінічную дакладнасць», з якой Эрно «раскрывае вытокі, адчужэнне і калектыўныя абмежаванні асабістых успамінаў». Еўрапейская прэса ўхваляе выбар камітэта і аддае даніну павагі бясстрашнай і палітычна актыўнай пісьменніцы. Нямецкая газета taz ухваляе рашэнне Нобелеўскага камітэта.
«У гэтым годзе Нобелеўскай прэміяй па літаратуры адзначана не нешта вытрыманае ў класічных канонах, узвышанае і вытанчанае. Не, узнагароду атрымала літаратура недасканалая, халодная як лёд і крывацечная падобна ране. Ані Эрно не з’яўляецца аўтарам, які з боку глядзіць на прыніжаных, абражаных і нікім не заўважаных, не, яна піша прама адтуль, з самых глыбінь гэтай перспектывы. Пісьменніца, якая мае 82 гады, застаецца вернай сабе, нягледзячы на сусветную славу. Яна бярэ ўдзел у палітычным жыцці, заўсёды выказвае сваю пазіцыю і ўстае на абарону бяздольных. Як сказана ў рашэнні Шведскай акадэміі, прэмія ўручаецца пісьменніцы ў тым ліку і «за мужнасць». У дадзеным выпадку гэта сапраўды так», – адзначае нямецкае выданне.
Агляд сусветнай прэсы падрыхтавала Вольга Сямашка.
Artykuł Агляд прэсы: без шанцу на пасіўнасць pochodzi z serwisu БЕЛАРУСКАЕ РАДЫЁ РАЦЫЯ.