Агляд прэсы: Ахілесава пята
Масква і Менск плануюць стварэнне сумеснай групоўкі. Якая будучыня чакае рэжым Пуціна? Ізраіль і Ліван урэгулявалі спрэчку аб марскіх межах.
Artykuł Агляд прэсы: Ахілесава пята pochodzi z serwisu БЕЛАРУСКАЕ РАДЫЁ РАЦЫЯ.
Масква і Менск плануюць стварэнне сумеснай групоўкі. Якая будучыня чакае рэжым Пуціна? Ізраіль і Ліван урэгулявалі спрэчку аб марскіх межах. Падрабязнасці свежых матэрыялаў замежнай прэсы ў аглядзе Вольгі Сямашкі.
Праз два дні пасля выбуху на Крымскім мосце, які адбыўся 8-га кастрычніка, прэзідэнт Беларусі Лукашэнка заявіў аб намеры сфарміраваць з Расеяй сумесную рэгіянальную групоўку войскаў. Дыслакаваць яе плануецца на тэрыторыі Беларусі. Рашэнне аб стварэнні падобнай групоўкі Лукашэнка абгрунтаваў тым, што Украіна нібыта выношвае планы па нападзе на Беларусь. На старонках еўрапейскай прэсы аднавіліся дэбаты аб тым, ці не ўступіць Беларусь у вайну на баку Расеі. «Лукашэнка апынуўся ў вельмі незайздросным становішчы», – адзначае польская газета Polityka.
«Альбо ён страціць уладу ў выніку народных пратэстаў, альбо Крэмль скіне яго з трона. Апошні варыянт дае яму некаторую прастору для манеўру. Лукашэнка, вядома, ведае, што Масква можа папросту замяніць яго афіцэрам беларускага сілавога апарата, у якім шмат агентаў расейскіх спецслужбаў. Лукашэнка, відаць, разлічвае на тое, што зможа адкупіцца ад расейцаў зброяй, абмундзіраваннем, прадастаўленнем палігонаў і матэрыяльна-тэхнічных аб’ектаў, і пацвердзіць тым самым сваю лаяльнасць, каб адтэрмінаваць рызыку рэальнага ўступлення ў вайну. Гульня на час мае сэнс, пакуль гэта дазваляе Пуціну падтрымліваць ілюзію моцнага лідара, у якога ёсць верныя саюзнікі», – падкрэслівае польскае выданне.
***
У чацвер і пятніцу ў сталіцы Казахстана Астане адбываюцца тры важныя сустрэчы на вышэйшым узроўні з удзелам кіраўнікоў дзяржаў Азіі і СНД. На сустрэчах прысутнічае і Уладзімір Пуцін. Некаторыя назіральнікі спадзяюцца, што яго перамовы з прэзідэнтам Турцыі Эрдаганам прывядуць да зрухаў на шляху да міру ва Украіне. Большасць аглядальнікаў, аднак, адзіная ў тым, што гэтыя саміты – толькі доказ таго, у якой ізаляцыі аказаўся цяпер Пуцін. Шведская газета Dagens Nyheter у такіх умовах звярнула ўвагу на тое, што ў ходзе галасавання ў ААН па рэзалюцыі з асуджэннем расейскай спробы анэксіі ўкраінскіх тэрыторый Індыя ўстрымалася. На думку Dagens Nyheter, гэта сведчыць пра тое, што краіна няхай асцярожна, але рухаецца ў бок Захаду.
«Вядома, прэм’ер-міністр Індыі Нарэндра Модзі не з’яўляецца лідарам, які ставіць у аснову свабоду слова і дэмакратычныя каштоўнасці. Тым не менш, Індыя выключыла з ліку сваіх партнёраў Кітай, і, зразумела, не звязвае сваю будучыню з праектам Пуціна, які цалкам дыскрэдытаваў сябе. Шлях Індыі на Захад не будзе простым і прамалінейным, але альтэрнатывы яму – нашмат горш», – прагназуе шведскае выданне.
***
З панядзелка Расея працягвае наносіць удары па энергетычнай, ваеннай і камунікацыйнай інфраструктуры Украіны, а таксама атакуе грамадзянскія аб’екты, прычым па ўсёй краіне, уключаючы цэнтр Кіева. Свае дзеянні Масква абгрунтоўвае «тэрактамі», якія нібыта арганізуюць украінскія ўлады на тэрыторыі Расеі, і абвінавачвае Кіеў у здзяйсненні выбуху на Крымскім мосце ў мінулую суботу. Як зазначае еўрапейская прэса, эскалацыя выйшла на новы ўзровень, які прынясе насельніцтву Украіны яшчэ больш пакут. А таму гішпанская газета El Mundo на першых старонках заклікае Захад паставіць Украіне сродкі ПРА і СПА.
«Уладзімір Пуцін хоча, каб грамадзянскае насельніцтва Украіны засталося ў зімовыя маразы без электрычнасці і ацяплення. Гэтая новая стратэгія таксама накіравана на знішчэнне ўкраінцаў як насельнікаў тэрыторыі, без разбору, і з’яўляецца чымсьці накшталт неканвенцыйнай зброі: ударамі крылатых ракет плануецца паралізаваць энергетычную інфраструктуру. Гэта падмацоўвае настойлівы заклік украінскага прэзідэнта да іншых краін зачыніць украінскую паветраную прастору ад варожых абстрэлаў. Толькі згода Захаду паставіць высокатэхналагічныя супрацьракетныя сістэмы зможа гарантаваць тое, што расейскі тыран не дасягне сваёй мэты – цалкам пазбавіць Украіну электрычнасці», – канстатуе гішпанскае выданне.
***
Ізраіль і Ліван афіцыйна знаходзяцца ў стане вайны. Тым не менш, па выніках перамоваў, якія доўжыліся некалькі гадоў, абедзве краіны змаглі прыйсці да пагаднення аб газавых радовішчах, размешчаных у акваторыях абедзвюх краін і, такім чынам, аб марскіх межах. Па словах кіраўніцтва Ізраіля, Ліван адмаўляецца ад сваіх прэтэнзій на газавае радовішча Карыш у абмен на доступ да газавага радовішча Кана, невялікая частка якога знаходзіцца ў ізраільскіх водах. А Ізраіль атрымлівае наўзамен частку выручкі. «Яшчэ адна добрая вестка з Блізкага Усходу», -мяркуе нямецкая газета Die Welt.
«Дасягнутая згода сведчыць аб тым, што актары ў гэтым рэгіёне наладжаны на будучыню. Відавочна, што дамоўленасць па марскіх межах адкрывае абедзвюм дзяржавам і іх партнёрам магчымасць бесканфліктнай распрацоўкі газавых радовішчаў, размешчаных уздоўж узбярэжжа абедзвюх краін. Гэтая перспектыва можа на працягу бліжэйшых гадоў дапамагчы вырашыць не толькі фінансавыя, але і энергетычныя праблемы абодвух удзельнікаў перамоваў, якія скончыліся. У доўгатэрміновай перспектыве ад гэтага выйграе і Еўропа, якая будзе мець патрэбу ў альтэрнатыўных пастаўшчыках энерганосьбітаў», – адзначае нямецкае выданне.
Агляд сусветнай прэсы падрыхтавала Вольга Сямашка.
Artykuł Агляд прэсы: Ахілесава пята pochodzi z serwisu БЕЛАРУСКАЕ РАДЫЁ РАЦЫЯ.