Агляд прэсы: Нейтралітэт як недахоп
Скандальныя заявы Лукашэнкі. Меркаванне з Ерэвана. Вайна супраць Украіны: наколькі ўразлівая Малдова?
Artykuł Агляд прэсы: Нейтралітэт як недахоп pochodzi z serwisu БЕЛАРУСКАЕ РАДЫЁ РАЦЫЯ.
Скандальныя заявы Лукашэнкі. Меркаванне з Ерэвана. Вайна супраць Украіны: наколькі ўразлівая Малдова? Збожжавая здзелка: Расея вырашыла павяртацца. СОР27: што чакаць ад кліматычнага саміту? Падрабязнасці свежых матэрыялаў замежнай прэсы даведаемся ў аглядзе Вольгі Сямашкі.
«Прэзідэнт Беларусі за апошні тыдзень не раз выказваў сваё меркаванне наконт Арменіі і сітуацыі ў рэгіёне. У Ерэване бесперапынна абмяркоўваюць яго скандальныя заявы аб урэгуляванні армяна-азербайджанскіх адносінаў і канфлікту на армянскай мяжы. Апошняя заява Лукашэнкі – што для Арменіі дастаткова пасярэдніцтва Расеі, і Захаду няма падстаў для ўмяшання», – передае міжнароднае выданне JAMnews.
«Раней Лукашэнка казаў, што Аліеў «абсалютна наш чалавек» і што супрацьпастаўляць Азербайджану ваенны блок АДКБ «няправільна». Пры гэтым ён не звярнуў увагу на тое, што Арменія сама з’яўляецца членам Арганізацыі Дагавора аб калектыўнай бяспецы і просіць саюзнікаў абараняць свае межы ад Азербайджана, які не з’яўляецца членам. МЗС Арменіі не палічыў мэтазгодным афіцыйна рэагаваць на заявы Лукашэнкі, але ў адказ на запыт СМІ расцаніў іх як «неўраўнаважаныя і пазасаюзніцкія». Сам Менск адказаў: «Беларусь на працягу ўсёй сваёй гісторыі не на словах, а на справе пацвярджае вернасць сваім саюзніцкім абавязацельствам». Пры гэтым на думку палітолагаў, заявы з Менску не адлюстроўваюць пазіцыю Масквы, хоць і Беларусь, і Расея праводзяць недружалюбную палітыку ў дачыненні да Арменіі», – паведамляе міжнароднае выданне.
У панядзелак расейскі бок нанёс па Украіне магутныя ўдары пры дапамозе ракет і дронаў. Аскепкі адной з ракет, збітай украінскімі сродкамі СПА, упалі на тэрыторыі Малдовы: каля вёскі, размешчанай ў прымежным раёне на поўначы краіны. Румынскія аглядальнікі з трывогай адзначаюць той факт, што ў скрайнім выпадку Малдова наўрад ці зможа абараніць сябе. «Дзяржаўная абарона Малдовы нявартая называцца такой», – заяўляе румынская служба Deutsche Welle.
«Нягледзячы на тое, што каля межаў краіны бушуе вайна, у Рэспублікі Малдовы няма ні сістэмы абароны, ні сістэмы СПА. Апошнія зенітна-ракетныя комплексы былі таямнічым чынам прададзены адной брытанскай кампаніі ў 2017 годзе. Яшчэ ў 1997 годзе Кішынёў прадаў Злучаным Штатам баявыя самалёты МіГ у колькасці 21 штукі, якія дасталіся Малдове пасля распаду СССР. Цяпер у Малдовы ўсяго шэсць МіГаў, якія, аднак, не могуць падняцца ў паветра, паколькі шэраг камплектуючых з іх быў дэмантаваны і прададзены за бясцэнак карумпаванымі чыноўнікамі ранейшых урадаў», – адзначае румынскі прадстаўнік нямецкага радыё.
Здзелка аб эспарце ўкраінскага збожжа праз Чорнае мора зноў уступіла ў сілу. Раней, 30-га кастрычніка, Масква абвясціла пра тое, што выходзіць з пагаднення, абгрунтаваўшы сваё рашэнне ўдарамі па Чарнаморскім флоце РФ, нібыта нанесенымі ўкраінскімі дронамі. Але зараз, як заяўляе Расея, дзякуючы пасярэдніцтву Турцыі Украіна дала гарантыі таго, што гуманітарны марскі калідор і свае парты яна будзе выкарыстоўваць толькі для экспарту харчавання. «Мэта пагаднення, а менавіта забяспечэнне пастаўкі пшаніцы ў бедныя краіны, ужо не стаіць так востра на парадку дня, а значыць, на гэтую здзелку можна проста махнуць рукой, тым больш што яна і так заканчваецца ў сярэдзіне лістапада», – піша нямецкая газета Handelsblatt.
«З ліпеня галоўнымі імпарцёрамі ўкраінскага збожжа былі Гішпанія, Італія, Турцыя, Кітай і Нідэрланды. Хутчэй за ўсё, гэта зерне ідзе там на гадаванне жывёлы. Да ліпеня месяца ўкраінскае збожжа набывалі перш за ўсё адносна бедныя краіны – Егіпет, Інданезія і Бангладэш. Аднак, мяркуючы па ўсім, яны ўжо знайшлі для сябе іншыя крыніцы. Акрамя таго, Украіна пашырыла свае магчымасці экспартаваць зерне па сушы. А значыць, не варта баяцца, што на сусветных рынках выльецца новы крызіс. Затое Расея такім чынам страціла б адзін з апошніх пакінутых у яе палітычных рычагоў падчас войнаў супраць Украіны», – рэзюмуе нямецкае выданне.
У панядзелак у егіпецкім Шарм-эш-Шэйху пачнецца 27-я Канферэнцыя ААН па змене клімату. Папярэдні саміт у Глазга завяршыўся заклікам да краін-удзельніц скарэкціраваць свае кліматычныя мэты. Але толькі 24 са 193 краін, якія падпісалі ў 2015 годзе Парыжскае пагадненне, прадставілі або абнавілі свае планы. Аглядальнікі абмяркоўваюць варыянты рашэнняў, а таксама сам сэнс правядзення такіх канферэнцый. «Палітыка адносна клімату можа быць паспяховай толькі пры ўдзеле Расеі і Кітая», – піша гішпанская газета El País.
«Мы можам весці апасродкаваную вайну супраць Расеі ва Украіне ці ўводзіць гандлёвыя санкцыі супраць Кітая. Ці ж змагацца са зменай клімату. Так, мы можам выйграць адну з гэтых войнаў, але не ўсе тры разам. Калі Захад пераможа Расею і Кітай, іх немагчыма будзе прыцягнуць да барацьбы са зменай клімату. Немцы маюць рацыю ў тым, што імкнуцца падтрымліваць шчыльныя адносіны з рускімі і з кітайцамі. Але яны зыходзяць з няслушных прычын. Замест таго каб заключаць прыватныя здзелкі з рускімі і кітайцамі, ім трэба было б прыцягнуць да справы Еўразвяз, і ўжо сумесна распрацаваць стратэгію, якая ўвязвала б магчымасць супрацоўніцтва з захаваннем кліматычнага парадку», – прапануе гішпанскае выданне.
Агляд сусветнай прэсы падрыхтавала Вольга Сямашка
Artykuł Агляд прэсы: Нейтралітэт як недахоп pochodzi z serwisu БЕЛАРУСКАЕ РАДЫЁ РАЦЫЯ.