Ян Абадоўскі: Мы будзем змагацца, пакуль рэжым не знікне
Грамадскі актывіст з Беластока распавядае пра дзейнасць беларускай дыяспары і падсумоўвае вынікі года.
Artykuł Ян Абадоўскі: Мы будзем змагацца, пакуль рэжым не знікне pochodzi z serwisu БЕЛАРУСКАЕ РАДЫЁ РАЦЫЯ.
Беларуская дыяспара Беластока падводзіць вынікі 2022 года. Сярод іншага, прайшлі шматлікія палітычныя акцыі, а ў сталіцы Падляшша з’явілася вуліца Вольнай Беларусі. Пра гэта, а таксама пра тое, з якім настроем прадстаўнікі дыяспары будуць сустракаць Новы год, пагаворым з нашым сённяшнім госцем – грамадскім актывістам з Беластока Янам Абадоўскім.
РР: Калі вы думаеце пра 2022 год, якія найбольш яркія падзеі згадваюцца?
Ян Абадоўскі: Напэўна, гэта пачатак вайны ва Украіне, калі адбылася расейская агрэсія. Дыяспара правяла вельмі шмат акцый з украінскай дыяспарай Беластока. Мы думалі, што павінна штосьці адбыцца, але не ведалі што. І гэта была наша першая акцыя напярэдадні вайны. У той жа дзень, калі пачалася так званая спецаперацыя ва Украіне, мы разам з украінскай дыяспарай зрабілі вельмі вялікую акцыю каля кансулята ў Беластоку, дзе сабралася вельмі шмат людзей, якія пратэставалі супраць расейскай агрэсіі.
Калі ўзяць іншыя акцыі, напэўна, гэта Дзень Волі, акцыя на гадавіну прэзідэнцкіх выбараў, калі мы рабілі маршы. Гэта сапраўды былі яскравыя таксама акцыі. Нам удалося ў Беластоку сабраць вельмі шмат людзей. Для Беластока сабраць 500 чалавек – гэта сапраўды значна. Радуе тое, што людзі бачаць нашу ініцыятыву, людзі нас падтрымліваюць і, нягледзячы на тое, што прайшло ўжо 2 гады пасля акцыі 2020 года, людзі надалей збіраюцца, паказваюць, што пратэст не знік, пратэст перайшоў сюды, за мяжу.
Усе мы дасканала ведаем, што ў Беларусі ніхто не можа адкрыта выйсці, каб пратэставаць, таму мы як дыяспара арганізоўваем тут розныя акцыі, у тым ліку акцыі ў падтрымку палітвязняў. Рабілі і велапрабегі, і ўсялякія турыстычныя злёты, дзе рабілі інтэграцыю дзеячаў дыяспары з розных краінаў. Вельмі шмат чаго адбываецца.
Вельмі радуе нас, што людзі далучаюцца да розных ініцыятываў, паўстаюць новыя ініцыятывы. І людзі хочуць далей змагацца да таго моманту, пакуль наша краіна не будзе вольнай.
РР: А што б вы сказалі тым людзям, якія пытаюцца: які сэнс у вашых акцыях, чаго вы можаце дасягнуць акцыямі?
Ян Абадоўскі: Сэнс нашых акцый – паказаць тое, што не ўсё прайшло дарэмна ў 2020 годзе. Мы пазнаёміліся. Тут вельмі жартуем, шмат людзей, якія дагэтуль жылі ў Белатоку, беларусы, не ведалі адно аднаго ў 2020 годзе сустрэліся каля плота кансулята, пазнаёміліся і вырашылі, што нам неабыякава тое, што адбываецца ў Беларусі.
На жаль, з кожным годам прыязджае ўсё больш і больш людзей, якія выязджаюць ад рэпрэсій, якія кожны дзень адбываюцца ў Беларусі. Выходзяць палітвязні, якія адсядзелі свае два гады, на іх узбуджаюць новыя крымінальныя справы, і мы павінны памятаць пра тых людзей, якія зараз тысячамі сядзяць за кратамі. Яны нічога не могуць зрабіць. Зрабіць могуць толькі людзі, якія знаходзяцца зараз за мяжой. Гэта нагадваць цэлы час пра тое, што адбываецца ў Беларусі, паказваць тое, што адбываецца ў Беларусі, паказваць тое, што мы ёсць і што мы будзем змагацца да таго моманту, пакуль гэты рэжым не знікне і не адбудуцца новыя дэмакратычныя выбары ў Беларусі.
Цалкам гутарку слухайце ў далучаным файле:
Беларускае Радыё Рацыя
Artykuł Ян Абадоўскі: Мы будзем змагацца, пакуль рэжым не знікне pochodzi z serwisu БЕЛАРУСКАЕ РАДЫЁ РАЦЫЯ.