Беларуская дыяспара Беластока правяла акцыю з нагоды „завочных судоў” у Беларусі
22 студзеня беларуская дыяспара Беластока арганізавала акцыю з нагоды „завочных судоў” і іншых фарсаў пад выглядам судоў, якія апошнім часам набываюць папулярнасць у карнікаў Беларусі:
09.01 пачаўся суд над супрацоўнікамі “ТУТ БАЙ МЕДЫЯ”: гендырэктарам кампаніі Людмілай Чэкінай, галоўным рэдактарам TUT.BY Марынай Золатавай, журналісткамі Вольгай Лойкай і Аленай Талкачовай і Кацярынай Ткачэнкай, якая працавала юрыскансульткай.
17.01 пачаўся завочны „суд” над Святланай Ціханоўскай, Паўлам Латушкам, Вольгай Кавальковай, Марыяй Мароз, Сяргеем Дылеўскім.
18.01 вынік чарговага „завочнага суда”: 12 гадоў калоніі прысудзілі пяці фігурантам справы «Чорнай кнігі Беларусі» падчас «завочнага працэсу». Гэта Яніна Сазановіч, Дзмітры Навоша, Данііл Багдановіч, Валерыя Занямонская і Вольга Высоцкая.
На гарадскiм пляжы Дайліды беларусы Беластока разгарнулі бел-чырвона-белыя сцягі, а таксама плакаты: «Завочны суд- не суд, а фарс», «Завочны суд. Канфіскацыя. Расстрэл. Беларусь 2023 год”, ”Вы можаце асудзіць і прызнаць мяне тэрарыстам, але вы не забярэце ў мяне Годнасць” і іншыя.
Некалькі асобаў традыцыйна на знак салідарнасці выкупаліся ў халоднай вадзе ў падтрымку смелых беларусаў, якія за свае палітычныя перакананні сядзяць ў турмах і на Акрэсціна.
Беларускае Радыё Рацыя
Artykuł Беларуская дыяспара Беластока правяла акцыю з нагоды „завочных судоў” у Беларусі pochodzi z serwisu БЕЛАРУСКАЕ РАДЫЁ РАЦЫЯ.