Алесь Бяляцкі не страціў за кратамі пачуцця гумару

Тонкае пачуццё гумару Алеся Бяляцкага, - так кажа адзін са слухачоў судовага працэсу над Нобелеўскім лаўрэатам.

Artykuł Алесь Бяляцкі не страціў за кратамі пачуцця гумару pochodzi z serwisu БЕЛАРУСКАЕ РАДЫЁ РАЦЫЯ.

Тонкае пачуццё гумару Алеся Бяляцкага, – так кажа адзін са слухачоў судовага працэсу над Нобелеўскім лаўрэатам.

Алесь Бяляцкі – адукаваны і культурны чалавек, які валодае вельмі тонкім пачуццём гумару. У перыяд абвяшчэння пісьмовых матэрыялаў крымінальнай справы, калі пракурор зачытвае звесткі сістэмы пасажыраплыні пра аднадзённыя паездкі Алеся Бяляцкага ў Вільню, праваабаронца адказвае:

-Я хачу звярнуць увагу, што Вільня 600 гадоў была і для нас сталіцай. І ездзіць у Вільню – гэта традыцыя ўсіх нашых продкаў усіх пакаленняў. А мы, калі былі студэнтамі ў 80-я гады, ездзілі ў Вільню, каб раніцай папіць кавы. Таму гэтыя аднадзённыя паездкі для вас, каму выезд за мяжу Рэспублікі Беларусь забаронены ў несяброўскія краіны, можа здацца чымсьці дзіўным. А для нармальных грамадзян, для беларусаў, гэта нармальная гістарычная традыцыя.

Алесь Бяляцкі вельмі тонка іранізуе з нагоды даных білінгу, якія сабрала следства, і агучвае ў судзе абвінаваўца пра ягонага калегу Віктара Сазонава. І Алесь звяртаецца да суда:

-У мяне дапаўненне да гэтай інфармацыі.

Суддзя: Па сутнасці, калі ласка.

Бяляцкі працягвае:

-Сазонаў з’яўляецца беларускім пісьменнікам. Гэтая інфармацыя для тых людзей, якія недастаткова ведаюць беларускую культуру. Ён напісаў некалькі кніжак апавяданняў на беларускай мове. Напісаў кнігу “Запіскі кантрабандыста”. Мне здаецца, змест гэтай кнігі недастаткова вывучаны.

Алесь Бяляцкі добра ведае гісторыю сваёй краіны. І каментуючы даныя мабільнага аператара пра месцазнаходжанне яго абаненцкага нумара, у тым ліку і на ягоным лецішчы – у Ракаве, Алесь тлумачыць:

-Згадвалася мястэчка Ракаў, якое ў 20-30 гады было сталіцай кантрабандыстаў з таго боку мяжы. Маё знаходжанне ў Ракаве можа таксама недастаткова было вывучана следствам і пракуратурай? Можа гэта таксама звязана з тым, што там была сталіца кантрабандыстаў?

Праз адсылкі да гісторыі Алесь іранічна і тонка высмейвае абвінавачанне, выстаўленае супраць яго і калегаў.

Наша карэспандэнтка пераказвае самыя запамінальныя моманты, а словы Алеся Бяляцкага цытуе паэт Сяржук Сыс:

Нагадаем, трэцяга сакавіка а 12-й гадзіне па беларускім часе абвесцяць прысуд старшыні праваабарончага цэнтра Алесю Бяляцкаму. Пракурор запрасіў яму 12 год калоніі.

А каб выказаць салідарнасць з праваабаронцамі “Вясны”, якія чакаюць прысуду, у розных гарадах свету запланаваны акцыі.

У Польшчы акцыі запланаваны:

• Варшава: 2 сакавіка, 18:00, каля амбасады Беларусі (ulica Wiertnicza 58).
• Люблін: 3 сакавіка, 17:30, каля Помніку Уніі Любельскай

У іншых краінах:

• Вільня, Літва: 3 сакавіка, 11:00, каля мурала Алесю Бяляцкаму (Mindaugo g. 18);
• Тбілісі, Грузія: 3 сакавіка, 19:00, каля Парламенту Грузіі

Таксама акцыі салідарнасці з Алесем Бяляцкім і “Вясной” будуць у Стакгольме і Капенгагене.

Беларускае Радыё Рацыя

Artykuł Алесь Бяляцкі не страціў за кратамі пачуцця гумару pochodzi z serwisu БЕЛАРУСКАЕ РАДЫЁ РАЦЫЯ.