Агляд прэсы: выратавальная саломінка
Еўразвяз крычыць «падман», бо Беларусь пасадзіла лаўрэата Нобелеўскай прэміі да 2033 года. Мірны план Кітая: ці ёсць шанцы на поспех? Новая палітыка Францыі ў дачыненні да Афрыкі. Італія: хто адказны за гібель 67 мігрантаў?
Падрабязнасці свежых матэрыялаў замежнай прэсы даведаемся ў аглядзе Вольгі Сямашкі.
«Зняволенне ў Беларусі актывіста, лаўрэата Нобелеўскай прэміі, было «фальшывым» прысудам у «фіктыўным працэсе», – заявіў першы дыпламат ЕЗ на фоне пагроз новых санкцый», – паведамляе еўрапейскае выданне Euobserver.
«Вярхоўны прадстаўнік ЕЗ па замежных справах Жазэп Барэль выступіў з заявай праз некалькі гадзін пасля таго, як у пятніцу (3 сакавіка) менскі суд прысудзіў Алеся Бяляцкага ў кайданках і ў прыгнечаным стане да большай часткі астатняга тэрміну зняволення. Летась 60-гадовы актывіст завочна атрымаў Нобелеўскую прэмію за працу на пасадзе старшыні ПЦ «Вясна».
Але гэтага было недастаткова, каб засцерагчы яго ад 10-гадовага зняволення па абвінавачванні ў фінансаванні пратэстаў і кантрабандзе грошай ва ўладаннях Лукашэнкі. У той жа дзень Беларусь таксама асудзіла трох іншых праваабаронцаў на тэрмін ад сямі да дзевяці гадоў «па фальшывых і палітычна матываваных абвінавачваннях». Еўразвяз самым рашучым чынам асуджае іх фіктыўныя суды, якія з’яўляюцца яшчэ адным жудасным прыкладам таго, што рэжым Лукашэнкі спрабуе прымусіць замаўчаць тых, хто выступае ў абарону правоў чалавека. Акрамя гэтага Лукашэнка трымае ў сваіх сутарэннях больш за 1450 палітвязняў. Паведамленні аб умовах унутры тычацца шматлікіх выпадкаў катаванняў і сэксуальнага гвалту. Як заўважыла міністр замежных спраў Германіі Аналена Бэрбок: «Менскі рэжым такім чынам змагаецца з грамадзянскай супольнасцю. Гэта такая ж штодзённая ганьба, як і падтрымка Лукашэнкам вайны Пуціна ва Украіне», — адзначае еўрапейскае выданне.
У гадавіну нападу Расеі на Украіну Пекін прадставіў план з дванаццаці пунктаў, пры дапамозе якіх ён прапануе ўрэгуляваць канфлікт. Прэзідэнт Украіны Зяленскі станоўча ацаніў заклік захоўваць «суверэнітэт, незалежнасць і тэрытарыяльную цэласнасць усіх краін», аднак да астатніх пунктаў Кіеў паставіўся скептычна. Прэзідэнт Францыі Макрон станоўча адазваўся аб ініцыятыве і аб’явіў пра тое, што мае намер наведаць Кітай з візітам. Еўрапейская прэса падзялілася ў меркаваннях наконт мэтазгоднасці кітайскіх прапаноў. Чэшская газета Deník лічыць, што ў прадстаўленым Кітаем плане маюцца станоўчыя моманты.
«Самае важнае зараз – гэта тое, што Кітай пачынае па-сапраўднаму супрацоўнічаць з Захадам, Украінай і, так, Расеяй – дзеля таго, каб дасягнуць справядлівага міру. І асновай яго павінна стаць тое, што агрэсар, гэта значыць Расея, нічога не атрымае па выніках гэтай вайны. А таксама тое, што Расея пакрые шкоду, нанесеную Украіне падчас несправакаванай расейскай агрэсіі. Пекін, магчыма, раней Масквы прыйшоў да высновы, што гэтую вайну Расея прайграла, і што яна яе не ў стане выйграць. Не выключана, што Кітай зараз ратуе свайго стратэгічнага партнёра ад перспектывы татальнага правалу і катастрафічнай паразы з непрадказальнымі наступствамі», – папярэджвае чэшскае выданне.
Напярэдадні свайго шматдзённага турнэ па афрыканскіх краінах, падчас якога ён наведае Габон, Анголу, Конга-Браззавіль і Дэмакратычную Рэспубліку Конга, прэзідэнт Францыі Эманюэль Макрон абвясціў аб новай стратэгіі Парыжа ў дачыненні да Афрыкі. Прэзідэнт заявіў, што неабходна скараціць французскую ваенную прысутнасць у рэгіёне і дабівацца раўнапраўнага супрацоўніцтва з былымі калоніямі. Аглядальнікі абмяркоўваюць магчымыя наступствы такой змены парадыгмы. Гішпанская газета La Vanguardia не хавае сваёй трывогі.
«ЕЗ шукае шляхі выхаду з новай сітуацыі і разглядае магчымасць размяшчэння ў Нігеры еўрапейскага кантынгенту. Хаос у зоне Сахеля пагражае распаўсюдзіцца на больш багатыя і стабільныя краіны Гвінейскага заліва, такія як Кот-д’Івуар. А з поўдня зыходзіць падвойная пагроза. З аднаго боку, гэта рост прысутнасці джыхадысцкіх арганізацый, якія могуць выкарыстоўваць зону Сахеля ў якасці плацдарма для тэрарыстычных актаў на поўдні Еўропы. З другога боку – узрастаючая залежнасць краін рэгіёна ад падтрымкі групы Вагнера, а значыць – і ад Расеі», – падсумоўвае гішпанскае выданне.
У выніку крушэння лодкі ля ўзбярэжжа Калабрыі загінулі 67 мігрантаў. Згодна з заявай ведамства ў порце, людзей можна было выратаваць. Італьянская прэса абвальваецца з крытыкай як на мясцовыя ўлады, так і на ўрад у Рыме, а менавіта на міністра ўнутраных спраў Матэа П’янтэдозі і міністра інфраструктуры Матэа Сальвіні. Еўрапейская прэса ўказвае на тое, што ў наяўнасці агульны правал палітыкі ЕЗ у гэтай сферы. «Палітыка ўрада, які нядаўна прыняў закон і які ўскладняе працу ратавальнікаў на моры, выклікае ўсё больш пытанняў», – адзначае італьянская газета La Stampa.
«Ясна адно: тое, што адбылося ў суботу ўвечары, кідае цень на стратэгію ўладаў, накіраваную на тое, каб ускладніць выратавальныя працы судоў НПА. Расследаванне, распачатае па факце інцыдэнта, выявіла і іншыя немалаважныя дэталі. Адміністрацыя порта запэўнівае, што выратаванне было магчыма, і што ўмовы надвор’я не былі такімі неспрыяльнымі, як было заяўлена раней. П’янтэдозі абвінавачвае арганізацыю Frontex, самалёт якой першым заўважыў лодку з бежанцамі, у тым, што тая не падняла трывогу. Механізм перакладання віны з хворай галавы на здаровую працуе поўным ходам», – канстатуе італьянскае выданне.
Беларускае Радыё Рацыя
Artykuł Агляд прэсы: выратавальная саломінка pochodzi z serwisu БЕЛАРУСКАЕ РАДЫЁ РАЦЫЯ.