«Пагаворым пасля нашай перамогі»
«Пагаворым пасля нашай перамогі». СБУ адмовілася каментаваць тое, што сёння нагаварыў Лукашэнка
Украінская Служба бяспекі афіцыйна адзначыла, што яна не будзе ніяк каментаваць сённяшніх заяў Лукашэнкі з абвінавачаннямі ды абразамі на адрас Украіны і яе кіраўніцтва, а ўсялякія падрабязнасці пра магчымыя дыверсіі будуць раскрытыя толькі пасля перамогі ў вайне.
«Служба бяспекі Украіны не мае намераў каментаваць словы чалавека, які называе сябе прэзідэнтам Беларусі. Што ж тычыцца любых выпадкаў «бавоўны», то пра іх мы зможам падрабязна пагаварыць пасля нашай перамогі», — заявіла СБУ.
А вось у Офісе прэзідэнта Украіны адрэагавалі на сённяшнія выпады Лукашэнкі. Вось што напісаў дарадца кіраўніка Офісу Міхаіл Падаляк:
«Трэба вызначыцца з дэфініцыямі. Тэракт – калі з тэрыторыі Беларусі запускаюць ракеты па ўкраінскіх гарадах. Дыверсіі – калі з беларускай мяжы заходзяць дыверсійныя групы. Удар па самалёту-карэктавальніку А-50 – антытэрарыстычны акт, здзейснены, дарэчы, мясцовымі партызанамі»
На тое, што Лукашэнка назваў Зяленскага «гнідай», Падаляк ды іншыя прадстаўнікі кіруючай вярхушкі Украіны пакуль ніяк не адрэагавалі.
Беларускае Радыё Рацыя
Artykuł «Пагаворым пасля нашай перамогі» pochodzi z serwisu БЕЛАРУСКАЕ РАДЫЁ РАЦЫЯ.