„Нёман” прыме „Металург” у першым матчы фіналу
У беларускай хакейнай экстралізе стартуе вырашальная серыя сезона.
Artykuł „Нёман” прыме „Металург” у першым матчы фіналу pochodzi z serwisu БЕЛАРУСКАЕ РАДЫЁ РАЦЫЯ.
У беларускай хакейнай экстралізе стартуе вырашальная серыя сезона. Да фіналу экстралігі дабраліся гарадзенскі „Нёман”, які заняў другое месца ў рэгулярным чэмпіянаце, і дзейны чэмпіён краіны жлобінскі „Металург”.
Падчас плэй-оф гарадзенцы выбілі з барацьбы за трафей „Хімік” з Наваполацка (4:0 у серыі) і сталічнае „Юнацтва” (4:3), прычым у дуэлі з мінчанамі „Нёман” упершыню ў гісторыі беларускага хакея адыграўся з ліку 0:3 у серыі. „Металург”, у сваю чаргу, у першым раундзе прайшоў „Гомель” (4:2), а ў паўфінале не пакінуў шанцаў лепшай камандзе „рэгуляркі” – салігорскаму „Шахцёру” (4:1).
Хакеісты „Нёмана” і „Металурга” сустракаліся ў фіналах экстралігі двойчы. У сезоне-2011/12 выйгралі жлабінчане, праз год гарадзенцы ўзялі рэванш. Усяго „Нёман” станавіўся чэмпіёнам Беларусі сем разоў, у „сталёвых ваўкоў” – два трафеі, другі з іх заваяваны ў леташнім розыгрышы.
„Вашынгтон” з Протасам паўдзельнічалі ў фенаменальным рэкордзе „Бостана”
У рэгулярным чэмпіянаце НХЛ „Бостан”, перамогшы „Вашынгтон” 5:2, абнавіў рэкорд лігі па колькасці ачкоў за чэмпіянат. Цяпер у „мядзведзяў” 133 пойнты ў „рэгулярцы”, на адно ачко больш, чым было ў „Манрэаль Канадыенс” у сезоне-1976/77. Беларускі нападнік „Вашынгтона” Аляксей Протас правёў на лёдзе 13 хвілін 53 секунды, бамбардзірскімі баламі не вызначыўся, запісаў у актыў 1 кідок, завяршыў сустрэчу з паказчыкам карыснасці -1.
„Нью-Джэрсі”, перамогшы „Бафала” 6:2 , пазбавіў „клінкоў” апошніх надзей на выхад у плэй-оф і гарантаваў сабе перавагу хатняга лёду ў першым кубкавым раундзе. Ніжэй за другое месца ў дывізіёне „д’яблы” ўжо не апусцяцца. Беларускі нападнік „Нью-Джэрсі” Ягор Шаранговіч у справаздачным матчы правёў на лёдзе 17 хвілін 13 секунд, бамбардзірскімі баламі не разжыўся, запісаў у актыў 1 сілавы прыём, 1 блок і 1 перахоп, завяршыў сустрэчу з паказчыкам карыснасці 0.
„Будаўнік” стаў фіналістам чэмпіянату Беларусі
Мінскі „Будаўнік”, пераадолеўшы супраціў гомельскай „Энергіі” 3:0, стаў фіналістам мужчынскага чэмпіянату Беларусі. Вынік паўфінальнай серыі – 3:1. У фінальнай серыі „Будаўнік” будзе супернічаць з салігорскім „Шахцёрам”.
„Рубін” Мартыновіча і Лісаковіча знайшоў новага трэнера
Рашыд Рахімаў у бліжэйшы час узначаліць казанскі „Рубін”, за які выступаюць беларусы Аляксандр Мартыновіч і Віталь Лісаковіч. „Рубін” раней узначальваў Юрый Уткульбаеў.
58-гадовы Рашыд Рахімаў вядомы па працы ў „Амкары”, „Лакаматыве”, „Ахмаце” і „Уфе”. „Рубін” займае 2-е месца ў табліцы расійскага другога дывізіёна, набраўшы 47 ачкоў у 26 матчах.
Красоўкі Джордана з апошняга фіналу НБА прададзены за рэкордную суму
Падпісаныя красоўкі шасціразовага чэмпіёна НБА Майкла Джордана прададзены на аўкцыёне „Сотбіс” за 2 мільёны 240 мільёнаў даляраў.
Пра гэта паведамляе прэс-служба івэнта. Пара стала самай дарагой у гісторыі сярод спартовага абутку, прададзенага на аўкцыёнах. У гэтых красоўках Джордан правёў другі матч свайго апошняга фіналу НБА 1998 года, у рамках якога „Чыкага” з лікам 4-2 абыграў „Юту”. Амерыканец набраў за гульню 37 ачкоў. Пасля выступу Джордан падпісаў красоўкі і аддаў іх хлопчыку, які абслугоўваў распранальню для наведвальнікаў.
Беларускае Радыё Рацыя
Artykuł „Нёман” прыме „Металург” у першым матчы фіналу pochodzi z serwisu БЕЛАРУСКАЕ РАДЫЁ РАЦЫЯ.