Сяргей Бульба: Лукашэнка з сілавікоў здолеў вырасціць асобную касту
"Госць Рацыі" – адзін са стваральнікаў Беларускага згуртавання вайскоўцаў, заснавальнік і былы кіраўнік Белага легіёну Сяргей Бульба.
Artykuł Сяргей Бульба: Лукашэнка з сілавікоў здолеў вырасціць асобную касту pochodzi z serwisu БЕЛАРУСКАЕ РАДЫЁ РАЦЫЯ.
„Госць Рацыі” – Сяргей Бульба – адзін са стваральнікаў Беларускага згуртавання вайскоўцаў, заснавальнік і былы кіраўнік Белага легіёну, суаўтар са Станіславам Суднікам “Руска-беларускага вайсковага слоўніка”, былы афіцэр.
РР: У 2020 годзе “людзі ў пагонах”, як іх называе Лукашэнка, не пайшлі за народам, пагадзіліся на фальсіфікацыю выбараў. Чаго не хапіла? Ці можа дзесьці глыбока ў іх галовах сядзіць меркаванне, што Беларусь – часовая дзяржава? А вось Расея – вечная. І калі Пуцін – за Лукашэнку, то нам таксама трэба за яго.
Сяргей Бульба: Як прадстаўнік “Рацыі” вы маеце рацыю, але часткова. Праблема значна глыбей. У 90-х гадах я памятаю, што сілавыя структуры былі часткай народа. А потым Лукашэнка заняўся тым, што пачаў з сілавікоў вырошчваць асобную касту. І яму ўдалося гэта зрабіць. Зараз ёсць “патрыцыі” і ёсць “плебеі”. То для “патрыцыяў” асобныя дамы, асобныя анклавы, абнесеныя плотам, каб яны менш камунікавалі з “плебеямі”. То бок, за пакаленне, за 25 гадоў іх вырасцілі і, так, гэта асобная каста. Праблема ўся ў гэтым. А калі браць канкрэтна 2020 год, то на маё разуменне, мы надта ўсур’ёз успрымалі наратыў пра тое, што нас выйдзе 100 тысяч і міліцыя пяройдзе на наш бок. Я ўжо пачаў дапытвацца: а дзе ваш бок, я сам перайду. У 2020 годзе мы не здолелі стварыць другі цэнтр сілы. У нашым перакуленым свеце ў нас не хапіла разумення таго, што калі мы ідзем да ўлады, то мы мусім ствараць цэнтр сілы, прычым з людзей, якіх паважаюць і з таго боку. Калі б сярод нас былі такія, тады іншы быў бы вынік. А так яны разумелі, што ёсць Лукашэнка, які ведае, куды ідзе. І наўрад гэтыя летуценнікі забяспечаць той ровень жыцця, які яны мелі пры Лукашэнку.
РР: А калі беларускі генерал атрымае два супярэчныя загады – адзін ад Пуціна, другі – ад Лукашэнкі, чый загад выканае?
Сяргей Бульба: Лукашэнка багата каго з іх трымае, таму што ўпэўнены, што яны асабіста яму адданыя. Напрыклад, за таго ж Карпянкова ён не сумняваецца, хоць Карпянкоў стварае зараз паралельную спецслужбу. Для чаго, я б задаўся пытаннем. У чым праблема Узброеных сіл Беларусі? Яны сапраўды не вераць, што Расея можа прайграць. Яны ўпэўнены, што за Расеяй настолькі магутны патэнцыял, што прайграць яна ніяк не можа. Яна можа мясам заваліць, але ж прайграць не можа. І якое, канешне, будзе жудаснае расчараванне. Я спадзяюся, мы стаім напярэдадні падзей, калі Расея пасыплецца так, як сыпаўся ў свой час Савецкі Саюз.
РР: Але можа быць і так, што пройгрыш ва Украіне Расея кампенсуе анэксіяй Беларусі. А дэмакратычны свет дасць такую маўклівую згоду, абы закончыць гэтую вайну. Ці зможа тады сказаць армія Беларусі Пуціну рашуча НЕ?
Сяргей Бульба: Не можа. Армія Беларусі можа ўзбрыкнуць толькі ў тым выпадку, калі яе пагоняць на смерць ва Украіну. Вось тады, магчыма, узбрыкне. І то, не вышэйшы камандны састаў, а якраз хто-небудзь з сярэдняга.
Сяргей Бульба збіраецца ва Украіну. У нашым эфіры ён абверг інфармацыю пра тое, што нібыта з’яўляецца неўязным у гэтую дзяржаву. Па словах Бульбы, ва Украіну ён паедзе ўжо на наступным тыдні.
Цалкам гутарку слухайце ў далучаным гукавым файле:
Беларускае Радыё Рацыя
Artykuł Сяргей Бульба: Лукашэнка з сілавікоў здолеў вырасціць асобную касту pochodzi z serwisu БЕЛАРУСКАЕ РАДЫЁ РАЦЫЯ.