Купалаўскаму запаведніку “Вязынка” – 75 гадоў
З 1972 года кожнае лета напачатку ліпеня Вязынка збірае сяброў, каб адсвяткаваць дзень нараджэння Янкі Купалы.
Artykuł Купалаўскаму запаведніку “Вязынка” – 75 гадоў pochodzi z serwisu БЕЛАРУСКАЕ РАДЫЁ РАЦЫЯ.
Вязынка – калыска народнага паэта Беларусі Янкі Купалы. Тут, у адным з найпрыгажэйшых куткоў Меншчыны, нарадзіўся Іван Дамінікавіч Луцэвіч. З 1972 года кожнае лета напачатку ліпеня Вязынка збірае сяброў, каб адсвяткаваць дзень нараджэння Янкі Купалы. З усяго свету прыязджаюць госці на радзіму беларускага паэта.
Вось і сёлета Вязынка будзе сустраць усіх тых, хто любіць Янку Купалу, яго творчасць, літаратуру і Беларусь. Тым больш, што Купалаўскі мемарыяльны запаведнік “Вязынка” сёлета 20 чэрвеня адзначае юбілей – 75-годдзе.
Філіял “Вязынка” быў заснаваны паводле пастановы ЦК КП(б)Б і СНК БССР “Аб увекавечанні памяці народнага паэта Беларусі Янкі Купалы” і адкрыты для наведвальнікаў 20 чэрвеня 1948 года. У 1972 года створаны Купалаўскі мемарыяльны запаведнік “Вязынка”.
На тэрыторыі запаведніка знаходзяцца рэчка Вязынка, якая дала назву мясцовасці, рэшткі былога маёнтка Замбжыцкіх: дом хатковых, свіран, хатка дваровых, стаў, стары сад, а таксама гарадзішча культуры штрыхаванай керамікі II–IV стагоддзяў н. э., валуны з высечанымі на іх радкамі з твораў Янкі Купалы, крыніца, дуброва, пасаджаная беларускімі пісьменнікамі да 100-годдзя з дня нараджэння паэта, помнік паэту (скульптар Заір Азгур), малыя архітэктурныя формы, узгорыстыя і лясістыя ваколіцы, якія з’яўляюцца прыроднай экспазіцыяй гісторыка-культурнага ландшафту, што адыгрывае вялікую ролю ў творах Песняра.
У 1972 годзе, паводле архіўных дакументаў і ўспамінаў старажылаў Вязынкі, рэстаўравана хата, у якой у 1882 годзе нарадзіўся будучы паэт, створана новая экспазіцыя.
Кожны экспазіцыйны комплекс суправаджаецца паэтычнымі радкамі Янкі Купалы і фрагментамі яго аўтабіяграфічных лістоў. У экспазіцыі выкарыстаны рукапісы Янкі Купалы і фатаграфіі з фондаў Дзяржаўнага літаратурнага музея Янкі Купалы; копіі дакументаў з Нацыянальнага гістарычнага архіва Беларусі.
У пакоі, дзе ў 1881–1883 гадах жыла сям’я Луцэвічаў, і сенцах узноўлены тагачасны інтэр’ер. Атмасферу даўняга побыту ствараюць аўтэнтычныя рэчы канца ХІХ – пачатку ХХ стагоддзя, сабраныя ў ваколіцах Вязынкі.
У будынку свірана, рэканструяванага ў 1992 годзе, дзейнічае сезонная экспазіцыя “Народныя святы ў творчасці Янкі Купалы”.
З 1972 года на тэрыторыі запаведніка да дня нараджэння народнага паэта Беларусі праводзяцца Рэспубліканскія святы паэзіі, песні і народных рамёстваў, з 1976 года – традыцыйныя злёты студэнтаў-філолагаў БДУ, з 2010 года – фінальныя канцэрты конкурсу аўтарскай песні “Купалаўскія вакацыі”, а таксама каляндарныя народныя святы.
Беларускае Радыё Рацыя
Artykuł Купалаўскаму запаведніку “Вязынка” – 75 гадоў pochodzi z serwisu БЕЛАРУСКАЕ РАДЫЁ РАЦЫЯ.