«Зеркало»: У Берасьці будуюць цэнтар патрыятычнага выхаваньня — грошы на яго зьбіраюць нават зь лекараў
На месцы старых казармаў Берасьцейскай крэпасьці вырашылі будаваць цэнтар патрыятычнага выхаваньня, але без асаблівых затрат, піша партал «Зеркало».
Паведамляецца, што дэю прасоўвае БРСМ і Штаб патрыятычных сіл, а будаўніцтва ідзе пры падтрымцы Берасьцейскага аблвыканкаму. Пры гэтым стараюцца прывабіць жадаючых бясплатна працаваць на суботніках і ахвяраваць грошы. Грошы таксама зьбіраюць у добраахвотна-прымусовым парадку.
Аб зборах з мэдыкаў на мінулым тыдні пісаў тэлеграм-канал «Белыя Халаты. News». Па іх інфармацыі, сума «ахвяраваньняў» адрозьніваецца ў залежнасьці ад кваліфікацыі: 3 рублі з малодшага пэрсаналу, 5 рублёў — зь сярэдняга і 10 рублёў — для лекараў. Прычым афармляюцца ўнёскі так: мэдыкі пішуць заявы і нібыта самі просяць, каб зь іх вылічылі пэўную суму.
Пра падобныя зборы расказаў і чытач «Зеркала», які працуе ў Берасьцейскім абласным клінічным шпіталі.
«Грошы сапраўды зьбіраюць, але ня так актыўна, як, напрыклад, на патрэбы Чырвонага Крыжа або дапамогу бежанцам, — апісвае ён сытуацыю. — Як зьвязаныя лекары і гэты цэнтар, нам не тлумачаць. Гэта з катэгорыі «абавязковых» плацяжоў з разраду падпісак на газэты, патрэбы Асвода і гэтак далей. Адміністрацыя на пяціхвілінцы даводзіць заданьне загадчыкам і старэйшым сёстрам. Ствараецца ведамасьць — і ты «добраахвотна» плаціш. Часам вылічваюць з заробку. Ёсьць людзі, якія ня плацяць прынцыпова, але такіх няшмат.
Пры гэтым чытач удакладніў, што на будаўніцтва цэнтру зьбіраюць не ва ўсіх бальніцах. Гэта пацьвердзіла яшчэ адна чытачка, якая працуе ў дзіцячым абласным шпіталі Берасьцяа. Па яе словах, ні яна, ні калегі аб такіх зборах ня чулі.
Чаму супрацоўнікаў бальніцы прымушаюць ахвяраваць грошы на будаўніцтва патрыятычнага цэнтру? З гэтым пытаньнем журналістка «Зеркала» патэлефанавала ў гарадзкое аддзяленьне БРСМ Берасьця як жонка аднаго з мэдыкаў. Ёй адказалі наступным чынам:
«Гэта рэспубліканскі праект, і наогул ён зьяўляецца дабрачынным. Цяпер у нас ідзе будаўніцтва гэтага патрыятычнага цэнтру, і ўкладаючыся ў яго, мы ўкладваемся ў будучыню, у разьвіцьцё краіны і маладзёжнай палітыкі. То бок, такая гісторыя... У нас гэта ўсё дабрачынна. Гэта ўжо на ўзроўні вашай арганізацыі, вашай установы аховы здароўя. Гэта значыць пытаньне да кіраўніцтва... У нас проста гэтая ініцыятыва ідзе ад БРСМ, ад выканаўчых камітэтаў. Такая акцыя ідзе па ўсёй рэспубліцы. Але мы ня ставім ніякую пэўную суму. Кожны чалавек колькі можа, столькі і ўкладае. Гэта ўсё па жаданьні, гэта ўсё дабрачыннасьць».
Пасьля падзеяў 2020 году ў Беларусі сталі масава ствараць «вайскова-патрыятычныя клясы», якія курыруюць сілавыя труктуры.
Як паведамляў у траўні віцэ-прэм’ер Ігар Петрышэнка, у Беларусі стварылі ўжо каля 800 патрыятычных клюбаў, а да канца бягучага году плянуюць стварыць патрыятычныя клясы ў кожнай школе Беларусі.