"Къоьллах ца уьду, хIаллак ца хила уьду"
Михальченко Лидия
Адвокат Оболенец Алексей: Стенна йоьху кавказхоша Европе тховкIело
Интерполо лоьхучу нехан дукхаллица мехкийн могIарахь рекордсмен ю Нохчийчоь. КIезиг бац леца кхайкхийначаралахь гIалгIай а, дагестанхой а. Стенна ду иза? Иштта ду "Кавказ.Реалиин" адвокатца Оболенец Алексейца хилла къамел.
- Алексей, Интерполо муха тIеоьцу кавказхоша, шаьш политика бахьана долуш леца кхайкхийна, олий, ден аьрзнаш?
–Буха дехкина бахьанаш а ца толлуш, тIеоьцу шега лаха кхайкхош хьажийна информаци Интерполо. Нохчий, масала, къам а, дин а бахьанехь кхайкхабо леца. Оьрсийчуьрчу политикан хьолах доьзна ду иза. Ткъа дагестанхой а, гIалгIай а леца кхайкхош, буха дуьллу бахьана цхьаъ хуьлу даима а – дин. Цара лелориг "нийса дин" дац, олий.
Кху муьрехь халла къера хила гIерташ схьайогIу Интерпол – Оьрсийчуьрчу нахана дуьхьал гIитточу девнийн бух политика хилар. Амма къам, дин бахьанехь нах леца кхайкхабо бохург дац цкъачунна тIеоьцуш.
Интерполехула лоьхучу нохчийн терахь (йиллина яржочу информацица – 160 стаг) ду Цхьанатоьхначу Штатийн а, Китайн а бахархойл дукха.
Лаца кхайкхийна нохчо схьалохуш, цуьнан битамашка язбина цо буьйцу нохчийн мотт. Оьрсийнний, нохчийнний меттанаш бен дац лаца кхайкхийна стаг схьакаро аьтто лучу битамашка Интерполо язбина.
- Стенна тIехь бехкебо леца кхайкхийнарш?
– Терроризмехь дакъалацарна. Масала, карарчу хенахь Германехь йолчу Акуева Аминатна и "дакъалацар" тIехьарчийна цуьнга цкъа тоьхначу телефонца доьзна.
И цуьнца къамел дина стаг, талламчаша чIагIдарехь, юкъарлонехь хилла контртерроран операцехь вийначу цхьана кхечу стагца. Оха биллинг теллина – тоьхна яц телефон. Ткъа нах, цунах бахьана а дина, хьийзийнийла-м хаьа тхуна.
"Модехь" ду кхин а цхьа бехкбиллам – Шемарчу тIамехь дакъалацар. И "бехк" массо а тайпанарчу тобанашна тIехьарчабо (ткъа тобанаш вовшашна дуьхь-дуьхьал лаьттачех хуьлу дукха хьолехь). 2013-чу Шарахь дуьйна коьртаниг ю Шемин тема. И тайпа девнаш, эзарнашкахь дацахь, бIеннашкахь ву. Дуккха а адамаша, вовшах а кхетта, аьрзнаш дан догIу оцу девнашна дуьхьал.
Шемин дозане стаг кхочийла а доцийла гойту тоьшаллаш хуьлу дукха хьолехь. Амма Интерполо тидаме а ца оьцу и факташ.
- Муьлха мухIажирш бу карарчу заманахь уггаре боккхачу кхерама кIел?
– Терроризмна а, низамехь йоцчу тIеман тобанашкахь дакъалацарна а бехке а бина, набхтешкахь а Iийна, арабевлла нах бу Нохчийчохь а, Дагестанехь а (Оьрсийчоьнан бехктакхаман кодексан 205, 208 артиклаш). Уьш бу муьлххачу а хенахь байа тарлуш. Лечкъа а бой, контртерроран операци дIахьо, олий, и нах хIаллакбеш хиларх лаьцна информаци ю. Хьаннашкахь карадо оцу нехан декъеш, иза диллина хуьлуш дерг ду. Ма-ярра теллина яц и тема.
Цундела уьду набахтешкара арабевлла нах Европе, ткъа цигарчу миграцин урхаллашкахь олу цаьрга: "Шуна дуьхьал бехктакхам а бац айбина, шун гергарнаш цхьаммо а ца хьебо". Даймахкара стаг вадар экономикан бахьане доккху Европерчу хьаькамаша. Дац иза ишта. Къоьллах ца уьду, хIаллак ца хила уьду.
Европехь кхоьру хIора нохчийн мухIажиран букъ тIехьа лаьтташ Кадыров Рамзан я Путин Владимир хиларна.
ЖамI – стаг Оьрсийчоьне дIало, цигахь иза хан ялале вов. Ас цунах "208-чу артиклан проблема" олу.
– Интерполан тептарахь ша карийча, хIун дан деза стага?
– Низамца а доцуш, Интерполе веллехь, Интерполан низамашна тIехьожучу комиссе, ша тептарера ваккха аьлла, яздан деза лаца кхайкхина волучу. Амма дохьуйту дехар хила деза ингалс, францойн, Iаьрбийн я испанхойн маттахь.
Стага, нагахь санна ша Европе я Украине кхаьчна велахь, кехат яздеш декъаоза еза мухIажирийн гIуллакхашна тIехьожу Цхьанакхеттачу Къаьмнийн организацин комисси. Бакъду, массанхьа а бац цунах пайда – СаIуда Iаьрбийчохь, масала.
Цу тIе, Оьрсийчоь чIагIлуш ю оцу новкъахь. Цхьанакхеттачу Къаьмнийн организацин контртерроран агенталлин коьрте хIоьттина оцу Организацехь Оьрсийчоьнан векал лаьттина Воронков Владимир.
Цхьанакхеттачу Къаьмнийн организацехь наркотакашца а, талорашца а къовсам латтабен комитет караэцна ца Iаш, терроризмца къовсам латтош йолу офис а шен караэцна Оьрсийчоьно. Ойла ел аш, мел дукха информаци кхочу хIинца Оьрсийчоьнан къайлахчу сервисашка.