"За безопасность" цIе йолчу боламан жигархоша Оьрсийчоьнан пачхьалкхан Думан кхерамзаллан а, коррупцина дуьхьало латточу комитете дехар дина полисхойн барзакъ дохкарна тIехь дозанаш тохахьара аьлла. Чоьхьарчу гIуллакхийн министраллан белхахойн духар а доьхна, Оьрсийчохь деш долу зуламаш алсамдевлла аьлла, яздо авторша шайн кехат тIехь. Жигархоша доьху, оьрсийн низамехь полисхойн духар лелорехь хийцамаш бар а, интернет-туьканашкахь маьрша тIеман барзакъ дохкар дехкар а.
Юга.ру хьостано яздира, дIадахначу шарахь Нохчийчохь рейдаш дIаяьхьира маьршачу бахархошлахь полисхойн духарш лелочарна дуьхьал аьлла. Iедалхошна хетарехь, республикан хьешашна а, туристашна а Нохчийчохь дуккха а полисхой а бу, маьI-маьIIехь уьш гарца хьал кхераме ду аьлла а тарлора.