Гадаев Мохьмад-Салахь. "Суьйре, Iуьйре гIийла йогIу..."
Гадаев Мохьмад-Салахь
* * *
Суьйре, Iуьйре гIийла йогIу,
Буьйсанаш ас шийла йоху,
Дагна везнарг вагIац, боху –
Ас хIун де те, йина нана?
Ас хIун де те, йина нана?
ХIун гур ду те суна кхана?
Маццалц лелар ю те пана?
Безамах ю бала хилла.
Безамах ю бала хилла.
Дог ца догIу шифон тилла,
Кога буха буткъа чилла. –
Сагатделла со ма хьийза.
Сагатделла со ма хьийза.
Кийрахь сан дог гIийла цIийза,
Сан коьрта чохь гIайгIа зийза, –
Дагна везнарг вагIац, боху.
Дагна везнарг вагIац, боху,
Суьйре, Iуьйре гIийла йогIу,
Буьйсанаш ас шийла йоху. –
Ас хIун де те, йина нана?