Эпидемин хьелашкахь а маьрша ца йоккху Саутиева Зарифа
"ГIалгIайн цхьааллин комитетан" декъашхочун Саутиева Зарифин хьокъехь адвокато чукхачийначу дехарна жоп ца делла Ставрополан кIоштан кхело. Регионехь эпидемиологин хьал кхераме латтарна, цIера дIасаялар а доьхкуш, лаьцначуьра мукъаяккха аьлла, дара цуьнан дехар. "Кавказ.Реалии" портале дийцина цунах Дзугаев Билана.
"Набахтехь атта дала тарло ун, - дийцина адвокато Дзугаевс. - Наркотикаш тIехь Iийна, хIинца царех дIахаьдда, хала мур ловчу зударшна юкъахь латтош ю Саутиева. Дукхахболчаьрца гепатит С а, ВИЧ а ю. Зарифа диабет йолуш ю. Чохь бахкочийн иммунитет эшна йогIу, царна ца кхачайо Д олу витамин. Нагахь цамгар цу чу кхачахь, Iаламат ирча сурт хир ду и ".
Дзугаевс сагатдо, СИЗО-хь карантин хIоттаяхь, гергарнаш а, адвокаташ а тIебуьтур ца хиларна а, талламан белхаш совцорна а.
"ХIинца юха а латкъамбеш ву со. Чохь латточу стеган дахарна кхераме хьал хIоьттинехь, зуламан кодексан низамаша могуьйтуш дац цигахь стаг латтор", - аьлла Дзугаевс.