Оьрсийчохь тIаьххьарчу цхьана дийнахь 153 стаг велла коронавирусах
ТIаьххьарчу дийнахь а, буса а Оьрсийчохь коронавирусах кхелхина 153 дархо, хаам бина эпидеми ца яржийта вовшахтоьхначу оперативан штабо, яздо "Коммерсанто". Де хьалха 95 пациент кхелхинера. Ун даьржичхьана верриг а кхелхинарг ву 8 359 стаг.
ТIаьххьарчу 24 сахьтехь Оьрсийчохь ун даьлла кхин а 7 425 вахархочунна. Верриг а цомгаш ву 599 705 стаг. Дарба хилла 12 013 пациентана.
Ткъа верриг а гIоле хилларг ву ун чудеачхьана — 356 429.
Къаьсттина дукха бу коронавирусан уьнах белларш:
Санкт-Петербургехь — 35,
Москвахь — 26,
Москван кIоштахь — 15.
Цомгаш нах дукха хиларехь массо а пачхьалкхашлахь кхоалгIачу меттигехь ю Оьрсийчоь, кхелхинарш алсам хиларца 13-гIа меттиг дIалоцу цо.
Малхбузерчу хаамийн гIирсаша масийттаза емалдира Оьрсийчоьно Iорадоху зераш. Бакъду, Дуьненаюкъарчу могушалла Iалашъяран организацин (ВОЗ) претензеш яц Оьрсийчоьне, цара Iорайоккху статистика бахьана долуш.