Австрехь дIавоьллина "Венера Анзор"
Тахана, шинарин дийнахь, Австрин коьртачу шахьарехь дIавоьллина вийна нохчийн политикан мухIажар Умаров Мамихан (Венера Анзор). Венерчу Лизинг олучу бусулбачийн кешнашкахь лаьтте кховдийна Умаров аьлла. Тезетахь хилира нохчийн диаспоран векалш а, иштта Умаровн гергара нах а, бевза-безарш а. Верриг а бIе гергга стаг вовшахкхеттера цу барамехь. Коронавирусан пандемина тIехула тоьхна дозанаш бахьана долуш тIехсов нахана дихкинера цига бахка. Кешнийн гобаьккхина ха деш полисхой а, Австрин къайлахчу сервисийн белхахой а хилла.
Венина гергахь коьртах герз тоьхна вийра Нохчийчоьнан куьйгалхочун Кадыров Рамзанан критик, "Венера Анзор" цIарца вевза Умаров Мамихан. Österreic газето бечу хаамца, зулам дина меттигерчу 19.30 хенаца "G3" олучу туьканна уллехь.
Шен YouTube агIонехь Умаровс яржайора Оьрсийчоьнан къайлаха ницкъаша Европерчу политикан эмигранташна, Ичкерин векалшна кIелонаш еш хиларх йолу информаци, шога критика йора Нохчийчоьнан таханлерчу куьйгалхошна.
Умаров Мамихан Австрехь вийна аьлла, шеконашца Нохчийчуьра схьаваьлла Ахтаев Сарали а, Магамадов Салман а лаьцна.
Европехь нохчий байъарна дуьхьал акци дIаяьхьира Венерчу Оьрсийчоьнан векалаллан гIишлона хьалха шинарин дийнахь. Иза хIотторан бахьана дара – нохчийн политикан мухIажар Умаров Мамихан вер.