ХIинжа-ГIалахь полицино йохийна Навальный къобалвеш хIоттийна пикет

ХIинжа-ГIалин центрехь, цхьацца стаг пикете а хIуттуш, оппозиционер Навальный Алексей лацарна а, политикан тутмакхаш набахтехь кхабарна а дуьхьалболчу наха, жигархо Исаев Къедар коьртехь а волуш гIаттийна акци йохийна полицино, хаам бо "Юг. МБХ медиа" ресурсо.


"Маршо Навальныйна/#маршо тутмакхашна" йоза тIехь долу плакат а карахь Исаев дIахьоьттина ткъеха минот яьлча еъначу полицино дIавигина иза.


Полицин декъехь хеттарш деш, кхерамаш туьйчуш кхаьбна политикан жигархо. Цо ша дуьйцу хилларг: "Веа стага левира со, хIора а гIертара Навальный мел кхераме, зуламе стаг ву суна хаийта. Хоьттура, хьал ло суна акцешка леларг ахча. Ас суо сайн лаамехь араваьлла бахар кхачаме дацара царна", — дийцина деа сахьтехь полицехь хан текхначу Исаевс.



Хьалхо хаам баьржира Краснодарехь лаххара а 4 цхьалха пикет хIоттийна Германера цIавеана, Шереметьево аэропортехь кеманара охьавоьссина оппозиционер Навальный Алексей лацар цатайначу наха, аьлла.
Коррупцица къийсам латторан Фондо кху муьрехь арахецна президентан Путин Владимиран "Геленджикерчу гIопах" лаьцна хIоттийна видеоматериал. Таллам баржийна Химки гIалахь Навальный Алексейна изоляторехь яккха 30 де хан кхайкхийначу шолгIачу дийнахь.