Джумаев дIахецар тIедожош пикете яьлла жигархо лаьцнера Москвахь
ПIераскан дийнахь пикете яьллачу жигархочун карахь плакат хиллера: "Маьршаваккха Джумаев!", "Политикан тутмакхашна маршо ло!", "Бехке мел воцург маьршаваккха!" аьлла, тIеяздина.
Джумаевн цIе тIехь хиларна лаьцнера шаьш аьлла хиллера полицино Пхунтсоке, вуьшта цхьааллин пикеташ йихкина яц Оьрсийчохь.
"Нагахь санна, со цхьа кхинволу политикан тутмакх дIахеца аьлла, араяьлла хиллехь, хIуммаъ дацара, пикеташ магош ю элира соьга полицехь. Дискриминаци ю иза, нохчех кхерар а ду, берех а цхьана. Дерриг дика дерзахьара цуьнца", -аьлла жигархочо Кавказ.Реалиин корреспонденте.
ГIебарта Балкхаройчуьрчу жигархочун Кочесоков Мартинан карабогIучу беттан 8-чохь хинйолу кхел бахьана долуш а пикете яла дагахь ю ша аьлла, хаамбина цо.
Маршо Радионо яздира, кху беттан 23-чохь Москвахь Навальный дIахецар тIедожош хIоттийначу митингехь омонхошна дуьхьало ярх Джумаев Сайд-Мухьаммада. Видео интернетехула яьржинчул тIаьхьа полицино лехамашка веллера иза.
Еарин дийнахь лецира Джумаев Псковн кIоштахь. Оьрсийчоьнан дозанехула дехьа а ваьлла, Прибалтикехь къайлавала Iалашо хилла цуьнан. Джумаевс лелош хиллачу мобилан телефонца аьтто баьлла, иза волу меттиг билгалъяккха.
Социалан машанашкахь яржийначу видео тIехь гуш ду, куьйгашца а, когашца а жимачу стага шена тIе гIожамаш еттачу ОМОН-ан эскархошна дуьхьалоеш.
"Бакъволу къонах", "киборг бохуш, дуккха а комментареш йитира Сайд-Мухьаммадах баккхийбечу наха видеона бухахь.
Iедалшкара пурба а доцуш, хIоттийначу акцехь полисхошна тIе куьйгаш даьхьна аьлла, бехкзуламан гIуллакх диллина Джумаевна дуьхьал.
Фейсбукан агIонехь петици яржийна нохчаша, Джумаев бехке вац, иза маьршаваккхар тIедожош.