Ессентукерчу "гIалгIайн девнехь" лебина эшам хилларш а, тешаш а
Зазадоккху-беттан 3-чохь левинчу цхьамма бохура ша шеггара хилла "политолог" ву, ша "теллина ГIалгIайчуьра социалан-политикан хьал". Цунах лаьцна дийцира Кавказ.Реалиига кхеле озийначу Ужахов Малсаган адвоката Куриев Мохьмада.
И стаг, лебинчех кхиберш а санна, цхьа а юкъарло долуш вац кхелехь хьехочу хьелашца, билгалдаьккхира Куриевс. "БехктIехьочу агIоно вуно дукха тешаш озийна шена герга. Тахханалц схьа цаьргара суна хезна дац прокурораша тIебаьхьинчу бехках лаьцна цхьа пайде хIума, бехк тIечIагIбеш йолу информаци. Ткъа цхьаболучара дуьйцурш ду бехктIебаьхьинчийн версица нийсса бIостанехьа довлу къамелаш. Аьлча а, лецначийн агIор нисло цара ден тоьшаллаш", - бохура адвоката.
Цо чIагIдарехь, хьалхарчун а санна, прокуроран версина "нийсса бIостанехьа" нисделира шолгIачу тешо дийцинарг а. Шена хетарехь, мехкан Iедалан политико бахьана делира протесташ гIитто, аьлла оцу тешо.
Хьалхо кхело левира гулам дIасабоккхуш эшам хилла кхо полисхо. Деллачу хеттаршна жоьпаш луш, цара даредина, шайна ца гира кхеле ийзийначех цхьаммо а "адамаш ницкъ бан гIиттош", аьлла.
Нохчийчоьнца хIоттийначу ГIалгIайчоьнан дозано шайн махкера латта дIадоккху аьлла, 2019-чу шеран бIаьста гуламе бехира бахархой тахана кхеле озийначу 7 гIалгIайн жигархочо. Царна бехке дуьллу экстремистийн тоба а кхоьллина, низамаш дохор.
Магасера протестан гулам полицино ницкъаша бохийра лурчах Зазадоккху-беттан 27-чохь.
Протестан жигархошна тIехь кхел йолийра бутт хьалха Кисловодскехь, амма цигара кхелан чоьнаш готта а хетта, Ессентукерчу кхелан гIишлонехь дIахьо ладегIарш.