Къилбаседа Кавказехь болх боцуш бисинчу нахах ах декъанна баттана а тоьур дац шайгахь дисина ахча
Кавказ.Реалиина HeadHunter-о бовзийтинчу талламо гойту Къилбаседа Кавказехь хеттаршна жоьпаш деллачу нахах, шаьш болх бечу меттигашкара дIа а ца бовлуш, керла болх лохуш 36% хилар.
Болх еххачу хенахь цакарочех бу юристаш, кхерамзаллин декъан говзанчаш, административан персонал, бухгалтераш. Респондентех кхоалгIа дакъа леткъа болх карон вуно хала хиларна.
Хеттаршна жоьпаш деллачу къилбаседа-кавказхойх 25% хоуьйту, шайна шаьш болх лоьхучу юкъанна баха оьшу ахча шайгахь кIиранна бен цахилар, 22% - шина кIиранна, 16% нахана ахча тоьу баттахь шаьш къинхьегам лоьхучу юкъанна.
"Экономикера хьал талха доладелча, къахьега меттиг алссам леха безаш, якъо хIутту. Говзанчаш дефицитехь хилар а, болх лучара хIун корматаллаш лоьху, конкуренци муха ю хьажжина хьал хIутту. Ткъа Къилбаседа Кавказерчу конкуренцех дерг аьлча, 5 стаг ву цхьа меттиг къовсуш", - боху HeadHunter-Юг цхььнакхетараллин пресс-векала Манохина Алёнас.
Цо дийцарехь, Кълбаседа Кавказехь дефицитехь бу медицинан, фармацевтикан, машенийн бизнесан, информцин технологийн говзанчаш а, белхахойн персонал а. Оцу хьукматашкахь ши стаг ву цхьа меттиг къовсуш, иштачу говзанчашна атта ду болх карон.
"Амма говзанчаш оьшучул совболчу хьукматашкара цхьа белхан меттиг къовсуш ву 7 стаг – юриспруденцера, кхерамзаллин хьукматашкара, лаккхарчу менеджментера корматалла ерш а, къона говзанчаш а бу уьш", – дийцира Манохинас.
Яхначу гурахь Оьрсийчуьрчу регионашлахь уггаре лакхара белхазалла йолу мохк бара ГIалгIайчоь. Белхаш бацарца къастабеллачу мехкийн кхаа лидершлахь яра Нохчийчоь а, РИА Новости агенталло бахарехь.