ГIебарта-Балкхаройчоьнан муфтиято кхайкхам бина, марха дастарна дозанаш тоха аьлла
ГIебарта-Балкхаройчуьрчу муфтиято кхайкхам бина Рамадан бутт боьрзуш Марха достучу дийнахь (Iийд ал-Фитр) хIиттош болу массо а кепара даздаран барамаш юкъахбаха беза аьлла.
"Дехар до, нийса кхеташ хилар, хIунда аьлча, ун даржаран кхерам лаьтта хIинца а, цундела вовшийн лардан деза вай", - аьлла, дIахьедина бусулба дин лелочаьрга мехкан муфтийс Дзасежев Хазраталийс.
Iийд ал-Фитран дийнахь ГIебарта-Балкхаройчуьрчу массо а маьждигашкахь Iийда дийр ду аьлла, дIакхайкхийна муфтиято.
Маьждигашкахь вовшахкехта леринчаьрга дехар дина Динан урхалло, Роспотребнадзоран массо а тIедилларш лардар а, шеца цхьана ламазан куз а, масканаш а, дезинфекци ен гIирсаш а бар.
Инстаграме хIоттийначу суьрта тIехь гуш ду оцу юкъанна, ГIебарта-Балкхаройчуьра имамаш муфтиятехь йоьдучу кхеташонехь масканаш а йоцуш хилар. Дуьхь-дуьхьал хевшина бу уьш, социалан дистанци ларъеш а йоцуш.
Хьалхо хаамашкахь дуьйцура, Къилбаседа ХIирийчоь а, ГIебарта-Балкхаройчоь а Оьрсийчоьнан регионашлахь, коьртачу сурсатийн мехаш къаьсттина тIебиттинчу 10 мехкашлахь билгалъяьккхина аьлла.
Ткъа ГIалгIайчохь Рамаданан баттахь мехашна тIехь терго латтон вовшахтуьйхира лерина комисси.