Прививкаш ца яйтахь шога дозанаш деттар ду аьлла нохчийн Iедалхоша
"Вайна юкъара цхьаберш бендоцуш лела шайца а, нахаца а. Прививкаш ца яйтахь ледара хир ма ю тIаьхьало. Цундела, сайн аьтто баьллачуьра, ас кхайкхамбина бахархошка, вакцинацех чекхдовла аьлла. Нагахь санна, прививкаш цара ца яхь, вай декхаре ду шога дозанаш детта", - яздина Кадыровс.
Парламентан спикеро Даудов Мохьмада а, кхечу Нохчийчуьрчу лаккхарчу даржхоша а масийттазза кхерамаш туьйсура, масканаш цалелочарна даккхий гIуданаш деттар ду шаьш бохуш. Оцу юкъанна меттигерчу бахархоша социалан машанашкахь бехкаш дохура Iедалхошкара, цара шаьш санитаран барамаш ларбеш цахиларна. Хаамийн гIирсашкахь шуьйра яздора, Кадыров Рамзана а, цуьнан гоно а нахана юкъахь масканаш цалелорах а, социалан дистанци ларъеш яцарх а.
Коронавирусна дуьхьал вакцинаци яйта реза берш а, боцурш а билгалбоху комисси кхолла еза, аьлла, дийцира Нохчийчоьнан куьйгалхочо Кадыров Рамзана. И къамел цо дира Соьлжа-ГIалахь COVID-19 цамгарна дуьхьаллаьттачу оперативан штабан кхеташонехь. Вакцинаци яйта резабоцчарна лоьрашкара гIо тIаьххьарчу рогIехь бен кхачо ца деза, дIахьедира Кадыровс Стигалкъекъа-беттан 25-чохь.
Кху шеран Чиллан-беттан 10-чохь Нохчийчоьнан куьйгалхочо Кадыров Рамзана хаамбира, масканаш лелор махкахь юкъарадаьккхина ша аьлла.
"Нах гуллучу меттигашкахь масканаш лелор юкъарадоккху оха. Делахь а, COVID-19 вирусан кхерам болчу баккхийчара а, цомгашчу наха а, оцу уьнах чекхвалазчо а лелийча бакъахьа хир ду", - яздинера Кадыровс шен Телеграмехь.
"Регионера хьал дукха лерина зийначул тIаьхьа" бина шаьш оцу кепара сацам бохура нохчийн урхалхочо.
Амма оцу юкъанна Росстато довзийтинчу терахьаша гойтура, Оьрсийчоьнан мехкашна юкъахь адамаш хьалхачул дукха даларца Нохчийчоь лидер хилар.