23 шо хьалха стаг лачкъийна хилла аьлла шеконевиллинарг лаьцна ГIалгIайчохь
Оперативан информацица, нах лечкъош, цаьргара бертаза ахчанаш дохуш лелачу регионашна юкъарчу ялх стагах лаьттачу тобанехь хилла ву иза.
1998-чу шарахь шен накъосташца цхьана Къилбаседа ХIирийчуьра вахархо вадийна хиллера цо, цуьнан гергарчаьргара цхьа миллион долларшкахь ахча даккхархьама. Шаьш боьхучу механ ах каракхаьчча, йийсарера маьршаваьккхинера иза. Кациев оцу зуламна гунахь хилар гучуделира масех шо даьллачул тIаьхьа, 2004-чу шарахь федералан лехамашка а ваьккхира иза.
Оцу тобанан вукху декъахошна кеп-кепара хенаш йиттира набахтехь яккха.
Чиллан-баттахь БуьритIерчу 41 шо долчу Оздоев Мохьмадна ворхI шо туьйхира колонехь даккха, 21 шо хьалха нах лечкъорна. 20 шарахь Адыгейхь харц кехаташца лечкъина ваьхна хиллера иза.
Стохка Зазадокху-баттахь 23 шо хьалха оцу кепарчу зуламна бехкевина Къилбаседа ХIирийчоьнан Пригородный кIоштарчу Тарское эвлара Чаниев Хьамзат а гучувелира. Шен юьртахо лачкъийначу цунна колонехь даккха пхи шо хан кхайкхийра.