Коронавирусан уьнца болчу нахана лерина кхин а тIе меттигаш схьайиллина Соьлжа-ГIалахь

Нохчийчохь коронавирусан ун даьржаш хиларна могушалла Iалашъяран министралло омра дина Республикерчу Эпендиевн цIарахчу дарбан хIусамехь ялх, номер 4 йолчу гIалин лазартнехь диъ, ковид токхуш болчу нахана аьлла, керла масех дакъа схьаделла аьлла. Могушалла Iалашъяран министарллерчу шайн хьостана тIетевжина бина и хаам Кавказ.Реалиино.


Хьалхо хиллачу эпидемин тулгIе йирзинчуд тIаьхьа а, дархой лахбала боьлча а махкахь коронавирусан уьнца болчу нахе хьожуш яра 9-гIа дарбан хIусам. Делахь а, керла гIаьттина тулгIе бахьана долуш оцу дарбанан цIийнехь тоьаш дацара маьнганаш. Цундела могушаллин министралло тIедиллина кхечу дарбанан хIусамашкахь кхин а сов меттигаш кечбе аьлла.



Кху деношкахь Нохчийчохь бертаза прививкаш йира, мах а луш, вакцина ярх сертификаташ эцначарна.
Нохчийчуьрчу бахархоша денна бохург санна хаамаш бо, вакцинаци йина аьлла, карахь тоьшалла дацахь юьртара юьрта даха бакъо яц шайн бохуш.
COVID-19 вирусна дуьхьал махкара массо а баккхийчара вакцина яйта еза, 60 процентна тIехь совцийла дац аьлла, дIахьедира Нохчийчоьнан куьйгалхочо Кадыров Рамзана. Вирусах бахархой кIелхьарабаха цхьаъ бен боцу некъ бу иза, бохура цо.
Вакцинаци яйта резабоцчарна лоьрашкара гIо тIаьххьарчу рогIехь бен кхачо ца деза, "кислород ца тоар мел хала хIума ду царна дIахаийтархьама аьлла, Кадыровс Стигалкъекъа-беттан 26-чохь дIахьединчул тIаьхьа хийцаделира Нохчийчохь прививкаш ярца долу хьал.