Дагестанерчу Агвалихь муфтиятаца хилла дов дIадирзина керла имам харжарца
Дагестанехь Цумадан кIоштарчу Агвали эвлахь керла имам харжарца дIадирзина меттигерчу бахархошна а, муфтиятана а юкъахь лаьттина дов.
Кавказ.Реалиино бинчу хаамца, меттигарчу маьждиган кхеташонан декъашхочо Маштихи Абдурахьима дийцина журналисташка, имамца доьзна хаттар Марсхьокху-беттан 20-чу буса дIадирзина аьлла. Цо билгалдаккхарехь, керлачу имамана реза бу эвлара бусалбанаш а, муфтият а. Иза ву карарчу хенахь Гаквари эвлахь имам волу Юсуп цIе йолу стаг.
Дагестанерчу муфтията цкъачунна комментари йина яц Агвалихь хIоьттинчу хьолана.
Карарчу беттан 17-чохь Агвали эвлан бахархоша керла имам хаьржинера шайн маьждиган. Кадимагомедов Магомедсайгид вара иза. Амма муфтиято, иза дан дезарг ша ю аьлла, оцу дарже хIоттийнера шайн кандидатура. Цунна реза бацара Агвали эвлара бахархой.