Беларусица дозанехь 2,5 метар керт ян Iалашо ю Польшин Iедалхой
Польшин Iедалхоша сацам бина, Беларусица дозанехь 2,5 метар лекха дуьхьало ян. Оршотан дийнахь бина цунах лаьцна хаам Польшин тIеман министро Блащак Мариуша. Ишта цо бахарехь, дозанхошна гIоьнна кхин тIе а эскархой узур болуш бу дозане.
ТIаьххьарчу кIиранашкахь чуоьху мухIажарш алсамбовларца доьзна Варшавехь йоху гIулчаш ю уьш. Бу уьш, Белорусин Польшица долу доза а хадош, Евросоюзехь тховкIело еха лаамца схьагIерта Иракъан а, Гергарчу Малхбален а, Азин а бахархой
Варшавина а, цуьнан Евросоюзехула болчу партнерашна а хетарехь, официалан Минск бехке ю, бакъо йоцуш мигранташ чуэхийтарна, Лукашенко Александран режим емал ечу шайн лулахошна хьовзам баккхархьама.
Хьалхо хаамашкахь дуьйцура, 900 гергга полшхойн эскархой хIинцале а дIахьовсийна дозанна гергарчу кIошташка бохуш.
Иштта Iалашо ю 50 ца кхоччуш Польшин бакъоларъяран органийн белхахой кхин а хьалха дукха чубаьржинчу мухIажаршца Iоттаеллачу Литвана гIо дан хьовсон.
Польшин дозанхойн хьукматан зерашца, 2020-чу шарахь дозанехь лаьцна 122 легалехь воцу мигрант, ткъа 2021-ра шо карадеачхьана бу уьш 800.
Литвахь и терахьаш кхин а лакхара ду.