"Тутмакхийн элана" ультиматум хIоттийна
Шалинский Ахьмаде кховдийначу претензешна тIетайна ишта нохчийн криминалан авторитеташ – Седой Гилани а, Саратовский Тимур а.
Агенталлан информацица, Шалинскийн цIарах ахчанаш оьхуш хилла Челябинскан а, Свердловскан а, Новосибирскан а, Кемеровон а, Волгоградан а, Ставрополан а мехкашкара. Оцу регионашкара тIаьххьарчу хенахь цо гулдинарг ду дерриг, мел лахара а, ши миллион долларшкахь ахча. Ткъа юкъахь оьшучу хьашташна ахча луш ца хилла цо.
Шалинскийс даредо, шега цхьаьнгара а ахчанаш кхьачна дац бохуш. Ткъа ахчанца доьзна шена дохку бехкаш, ишта Москвахь а, Нохчийчохь а 150 а, 300 миллион долларшна эцна петарш, Шалинскийс билгалдаккхарехь, цо "чохь хан токхучу заманчохь къа а хьегна, даьккхина ду".
Нохчийчуьрчу Шелара ву Домбаев. Москварчу тIеман кхело талораш дарна 2011-чу шарахь набахтехь яккха 10 шо хан туьйхира цунна. Текхана набахтеш Къилбаседа ХIирийчохь, Оренбурган а, Челябинскан а мехкашкахь. Маьршаваьлла, Нохчийчу юхавеана 2019-чу шарахь.
Набахтера мукъаваьлла дукха хан ялале иза Москва дIавахара ваха. Цо даймохк дIатассале дара мехкан куьйгалхочо Кадыров Рамзана, шен ларам бац " тутмакхийн низамашка", " тутмакхийн элийн" шайн Нохчийчуьра гIуллакхаш дита дезар ду аьлча.
2020-чу шеран Марсхьокху-баттахь Къилбаседа ХIирийчоьнан чоьхьарчу гIуллакхийн министралло дIахьедира, Домбаевна дуьхьал бехктакхаман гIуллакх гIаттийна цо криминалитетан тIегIанашкахь лаккхара "дарж" шена тIеэцарна, аьлла. Талламо бахарехь, цунна "тажтиллина" иза БуьритIерачу №1 колонехь хан йоккхуш волчу шерашкахь.