Нохчийн батальонан штабан куьйгалхочун хIусам теллина Украинан полицино (+видео)
Шейх Мансуран цIарахчу батальонан штабан куьйгалхочун Идрисов Муслиман хIусамехь талламаш бина Украинан полицин белхахоша. Кавказ.Реалии портале цо ша бина и хаам. Идрисовс билгалдаьккхина, цхьана а кепара бакъо а йоцуш хьоьвсина уьш шен хIусамах аьлла.
"НеIаран горгали бийкира, ас схьайиллира. Патрулан полицин ши белхахо вара белхан барзакъ доьхна, кхин а виъ вара могIарчу бахархойн духарца. Цхьаммо белхан кехат гайтира суна, зуламхойн гIуллакхаш толлучу декъера ву ша аьлла. Цуьнан цIе а, муьлхачу даржехь иза ву а деша ца кхиира со", - аьлла Идрисовс.
Цо бахарехь, цуьнан чохь герз дуй хьовсуш бара уьш. ХIусам теллина, масех шарахь Идрисовс лелош йоцу мобилан телефон схьаяьккхира цара, цул тIаьхьа дIабахара.
"Бинчу талламах а, соьгара яьхьначух а хIоттийна протокол дац", - аьлла, тIетоьхна нохчийн штабан куьйгалхочо.
Цо билгалдаккхарехь, полисхоша шаьш лелориг доьзна аьллера цуьнга, Украинан президентан хьалхарчу гIоьнчана Шефир Сергейна динчу тIелатарца. Цуьнан машенна автомат йиттинера карарчу беттан 22-чохь Киев гIалина чувуллучохь.
Шен адвокато Киеверчу Дарницкан кхеле дахьийта кехат ду кечдеш, шен хIусамах таллам бан бакъо цара елла хиллий хьожуш аьлла, дIахьедина Идрисов Муслима.
Стигалкъекъа-беттан 14-чохь Украинин къоман кхерамазаллин Кхеташоно леррина санкцеш кхайкхийра нохчийн батальонан командирна ЧIеберлойн Муслимна а, кхин а масех тIемлочунна а дуьхьал. Батальоно тIом бина Оьрсийчоьнехьа болчу ницкъашна - "ДНР" а, "ЛНР" а олучу тобанашкара сепаратисташна дуьхьал.
Шайхан Мансуран цIарахчу батальонна гIортор йина АТО-хь (антитерроран операцехь) дакъалоцуш тIом бинчу шайн лаамечерах лаьттачу тIеман дакъойн куьйгалхоша а, ткъа иштта цхьаболчу политикаша а, юкъараллин жигархоша а. 50-а гергга юкъараллин вовшахтохаралло кхайкхам бина президентан Офисе, санкцеш кхайкхийначу нахана юкъара нохчийн тIемалой дIабаха аьлла. Ткъа "Правый секторан" векалша дIахьедина, нагахь нохчийн тIемалошна депортаци ян гIортахь, шаьш цунна, герз а карахь, дуьхьало йийр ю аьлла.