Кадыров Рамзанан ден цIарах хир ю Нохчийчуьра ОМОН а, СОБР а
Нохчийчоьнан президент лаьттинчу Кадыров Ахьмадан, мехкан урхалхочун Кадыров Рамзанан ден цIе тиллина Нохчийчуьрчу полицин лерринчу декъана. "Ахмат" СОБР, "Ахмат-Грозный" ОМОН, "Ахмат-Крепость" ОМОН – иштта цIераш лелор ю хIинца дуьйна оцу дакъоша. "ВКонтактерчу" шен агIонехь Кадыров Рамзана дIахьедарца, керла цIераш техкина царна Оьрсийчоьнан Къоман гвардин эскарийн Федералан урхаллан омраца. Цо бахарехь, оцу дакъойн цIе хийцаро "йоккха стимул лур ю эскархошна кхин дIа а гIуллакхдан".
Маршо Радионо яздира, Нохчийчохь КадыровгIеран доьзалан культ яржош хиларх. Веллачу президентан, карарчу хенахь мехкан урхалхо волчун ден цIарах ю республикехь кеп-кепара объекташ, шайлахь географин гIишлош а – Ахмат-юрт, Соьлжа-ГIалара Ахматовский кIошт, шахьарара аэропорт, Нохчийн пачхьалкхан университет. Кадыров Ахьмадан цIарах ю, "Новая газето" церан ларми чохь дукха нах байина аьлла, Iораяьккхинчу Росгвардин полк а.
Американ Цхьаьнатоьхначу Штатийн Пачхьалкхан департаменто керла санкцеш кхайкхийра Нохчийчоьнан куьйгалхочунна Кадыров Рамзанна дуьхьал адамашна тIехь Iазап латторна а, кхел а янза, адамаш дайъарна а, кхин йолу а адамийн бакъонаш талхорна а. Санкцеш хьакхаелла цуьнан зудчух Кадырова Меднех а, церан шина йоIах Iайшатах а, Каринех а (Хадижат).
2020-чу шеран ГIуран-беттан юьххьехь Американ Цхьаьнатоьхначу Штаташа адамийн бакъонаш талхочу Нохчийчоьнан куьйгалхошца доьзна "Магнитскийн санкцийн глобал-тептара" язйира футболан "Ахмат" клуб а, латархойн "Ахмат" клуб а, Кадыровн Ахьмадан цIарх йолу фонд а.
Зазадоккху-беттан 30-чохь Американ Цхьаьнатоьхначу Штатийн арахьарчу гIуллакхийн урхалло йоккха артикл арахецнера Оьрсийчохь 2020-чу шарахь адамийн бакъонаш мел талхийна хоуьйтуш. Нохчийчоь 48-зза хаьхийнера документехь, ткъа Кадыров Рамзан – 14-зза.