Махкара дIавахначу журналистан 80 шо долчу нене барт хаьттина Талламан комитето
Ши шо хьалха Гуьржийчу дIавахначу Ростоврчу журналистан Резник Сергейн доьзалан хIусамех хьоьвсина бакъоларъяран органийн белхахой. 80 шо долчу ненера а, кхиазхо-кIантера а компьютер а, мобилан телефонаш схьаяьхна. Адвокат цхьаьна а воцуш хеттарш дина хилла цаьрга. Свобода Радион корреспонденто бина и хаам.
Доьзалехь талламаш бечу заманчохь гIоьртина хилла, Резника дийцарехь, цуьнца дина йозанаш карон. Iаткъамбар дузу цо ша бечу балхаца.
Оьрсийчоьнан къилбехь а, иштта полицехь а, ФСБ-хь а йолчу коррупцех лаьцна авторан телеграм-канал ю Гуьржийчуьра лелош Резника.
Резник – журналист-талламбархо ву, политикан тутмакх лаьттина а ву иза. Антикоррупцин цхьа могIа материалийн автор ву иза. 2017-чу шарахь Сахаров Андрейн цIарах совгIат дира цунна.
Ши шо хьалха дIавахара иза пачхьалкхера, бехкзуламан гIуллакх шена дуьхьал даккхарна кхоьруш, амма цуьнан доьзал баха бисина Ростов-на-Дону гIалахь.
2021-чу шарахь цунна дуьхьал айдира бехктакхаман гIуллакх, нацизм къобалъярна аьлла. Федералан лехамашка велла а ву иза.
"[Ницкъхоша] цкъа а ца хиллачу кепара Iаткъам латтабо сан доьзална, беран а, къеначу ненан а могушаллица кхерамаш а туьйсуш. Закъалте лоьцуш практика ю юкъаялош. Со цIа ваийта хьийза уьш. ХIун дина ас оцу пачхьалкхана? Цара къоладар а, уьш мукадехкий хилар а дIагайтина-кх. Бакъ ма ду иза", - дIахьедина журналисто.
Цунна дуьхьалъяьккхинчу нацизмана реабилитаци яр аьллачу артиклца а догIуш, шина шаре, йа пхеа шаре гергга набахтехь яккха хан кхачайо журналистана.