Кадыров Ахьмадан цIарах маьждиг дан тарло Беларусехь

Беларусехь дийцарш хилла республикан муфтийн Шабанович Абу-Бекъира а, Нохчийчуьрчу динан урхаллан аппаратан куьйгалхочун Курбанов Супьянан а. "Чечня Сегодня" ресурсо яздарца, оцу цхьаьнакхетарехь Кадыров Ахьмадан цIарахчу фонде ваьлла Шабанович, Брестехь маьждиг дар хьоьхуш.


"Нохчийн къоман бакъволчу кIентан, Нохчийчоьнан президентан Кадыров Ахьмадан цIарах хир ду и маьждиг", - яздо агенталло, цIарах буьйцуш боцчу Динан урхаллан векалийн дешнашца.


Беларусерчу бусулбачийн официалан сайтехь информаци тIечIагIйина, "регионерчу Кадыров Ахьмадан цIарахчу фондо маьждигаш деш, тодеш, реконструкци еш Нохчийчохь белхаш бина ца Iа" аьлла, билгалдоккхуш.


Мукъаденошкахь Минскехь дIаяьхьира Кадыров Ахьмадна лерина 14 шо долчу кхиазхошлахь ламаз дан хаар толлуш конкурс.


Нохчийчохь школан программи юкъа яхийтина Кадыров Ахьмадах лаьцна книга. 2004-чу шарахь вийначу регионан президентах лаьцна "Серлоно сирлабаьккхина некъ" книга Iамор ю школашкахь лаккхарчу классашкахь.


Маршо Радионо яздира шен агIонашкахь, Нохчийчохь КадыровгIеран культ дIахIоттош хиларх. 


Нохчийчоьнан президент лаьттинчун цIе лелош бу Нохчийчохь 300 урам, Соьлжа-ГIалара коьрта майда, паркаш, Нохчийн пачхьалкхан университет, школаш, гимназеш, берийн бошмаш, "Нохчийчоьнан дог" маьждиг, Чиллан-баттахь "Новая газето" церан ларми чохь дукха нах байина аьлла, Iораяьккхинчу Росгвардин полк а.


Кадыров Ахьмадан цIарах йира ЦIоьнтара - Ахмат-юрт. Цул совнах, 2020-чу шарахь дуьйна Американ Цхьаьнатоьхначу Штатийн финансийн министраллан санкцийн тептарехь йолу республикера футболан а, латархойн а клубаш а, иштта, фонд а.


Кху шеран Товбеца-баттахь Оьрсийчоьнан президенто Путин Владимира Соьлжа-ГIаларчу дуьненаюкъарчу аэропортана елира, карарчу хенахь мехкан куьйгалхо волчу Кадыров Рамзанан ден, Кадыров Ахьмадан цIе.