Оьрсийчоьнан Мюнхенера векалтна хьалха Нохчийчохь лелочу таIзаршна дуьхьала акци дIаяьхьна
Консульствана некъал дехьа хIоттийначу оцу митингехь дакъа лецира 70 сов стага. Гулбеллачеран карахь дара плакаташ "Буданов – Ахьмадан некъан хьалханча" (оьрсийн полковник Буданов Юрий 10 шарна чувоьллира 2003-чу шарахь 18 шо долу нохчийн йоI Кунгаева Эльза лачкъа а йина иза ерна, 2011-чу шарахь иза вийра хенал хьалха набахтера маьршаваьлча – ред.), "Со/Тхо ЯнгулбаевгIара", "Мусаева Заремина – маршо", "Кадыров дуьненаюкъара террорист ларар доьху оха". Плакаташ оьрсийн, немцойн, ингалсан а меттанашкахь дара, ткъа гулбеллачара нохчийн мотт буьйцура.
1ADAT боламехь Мусаева Зарема лачкъор а, цунна дуьхьал бехктакхаман гIуллакх даккхар а гайтаме ду, аьлла. "ЯнгулбаевгIара хьийзор доьзна ду кадыровгIарна уьш тхан куьйгалхой хетарца, цундела митингехь тхан жигархоша дIахаийтина 1ADAT – иза къоман болам хилар а, цунна тIехьбоьвлла лелар иза сонталла хилар а", - дIахьедина жигархоша.
Оцу тайпа дIахьедарш деш митинг оцу дийнахь хIоттийра Стокгольмехь а. Цигахь вистхилира Масхадов Анзор – тIе ца эцначу Нохчийн республика Ичкерин президентан Масхадов Асланан кIант. Цо а, кхинболчу декъашхоша а дийцира Нохчийчуьрчу Iедалхоша лелочу харцонех, цара нах лечкъорах, уьш байъарх лаьцна.
Дечкен беттан 20-хь Чоьхьарчу гIуллакхийн министраллин (МВД) белхалоша ЯнгулбаевгIеран петар чу а лилхина нуьцкъаха, тIе йовха бедарш а ца йохуьйтуш, бакъонашларъярхочун нана Мусаева Зарема Соьлжа-ГIала дIийигира, теше санна хеттарш дан. Цкъа дуьххара Мусаевана кхело I5 дей-буьйсий туьйхира чохь даккха, полисхочунна тIелатарна а, иза сийсазварна а аьлла, цул тIехьа цунна дуьхьал бехктакхаман гIуллакх диллира протокол хIотточу юкъанна полисхочунна тIекхетта ницкъ бина аьлла, бехке а еш.
Соьлжа-ГIалахь дIаяьхьира нохчийн къоман ЯнгулбаевгIарна дуьхьало ярна тIехь цхьаалла гайта хIоттийна митинг. Нохчийчуьрчу Iедалхошна хетарехь, и доьзал бу Кадыровн критика ечу анониман 1ADAT телеграм-канал лелориг. Митингехь дагадора, хьоьшура, этIадора ЯнгулбаевгIеран доьзалхойн суьрташ, иштта нисса дIа кхерамаш а туьйсура царна. Нохчийчоьнан Iедалхоша бахарехь, гулвелларг вара 400 эзар стаг. Ткъа боьзнабоцу тергамхойн хаамца, и нах ткъозза кIезга бара.
Францерчу Страсбургехь Дечкен-беттан 8-чохь митинг хилира, Нохчийчуьрчу Iедалхошна оппозицехь болчу жигархойн а, блогерийн а гергарнаш лечкъорна а, оьрсийн набахтешкахь бала хьегийтарна а дуьхьал. Акци вовшахтоьхначех яра, даймахкара дIабахначу Нохчийчуьрчу бахархойн юкъараллийн организацеш вовшатухуш йолу Европерчу нохчийн Ассамблея а, Евробертан исс пачхьалкхера жигархой а.
ГIуран-беттан 30-чохь Венерчу адамийн Бакъонийн майданахь а хIоттийра митинг Нохчийчохь нах лечкъорна а, нохчашна Оьрсийчу депортаци ярна а дуьхьал. Изза митинг дIаяьхьира оццу дийнахь Норвегин коьртачу гIалахь Ослохь а.