Кадыровс бакъдина Украинехьа тIом беш нохчий хилар, царна кхерамаш тийсина цо

ТIеман барзакъ доьхна, шайлахь герзанаш долуш нах гойту видео гIаръяьккхина Кадыров Рамзана, оцу кIелахь Украинехьа тIомбечарна кхерамаш тийсина цо, шен декъехь Нохчийчуьра схьабоьвллачарна а. Хьалхо Оьрсийчоьнан регионан хьалханчас бакъ ца дора тIаьххьарнаш Киеван агIо лаьцна тIемашкахь дакъа лоцуш бу бохург.


Украинехьа тIом бан бахначу Евробертан пачхьалкхашкара нохчашлахь кIезга бац хьалхара а, шолгIа а оьрсийн-нохчийн тIемашкахь дакъалаьцнарш, аьлла Кавказ.Реалиига Венера Kulturverein Ichkeria-н ("Культуран центр "Ичкерия") куьйгалхочо Исханов Хьусайна. 


Цо бахарехь, Львов гIалахь вовшахтухуш ю Оьрсийчоьнан агрессина духьал лата кийча йолу нохчийн шайн лаамехь отряд: "Шайн лаамахь арабевлла нохчий кийча бу украинхошна гIодаккха хIокху вуно халчу муьрехь. Тхуна диц ца делла украинхоша Ичкерин суверинитет ларъеш гIо даккхар".


Хьалхо Великобританехь веха нохчийн политик, тIе ца эцначу Ичкерин цхьахволчу хьалханчас Закаев Ахьмада Настоящее время телеканалан эфирехь дIахьедира, Европехь беха нохчийн кийча хилар Оьрсийчоьнан тIелатарах Украина ларъеш тIом бан.



Украинан президенто Зеленский Владимира кхайкхамбира, оьрсийн эскаршна дуьхьал тIом бан схьакхета луучу арахьарчу мехкийн бахархошка, Украине а дуьлий, дозанаш чIагIдан луучийн могIарш дуза аьлла.
Кавказ.Реалиино дийцира Украинехь тIомбечу нохчех лаьцна: оьрсийн тIеман ницкъийн декъехь а (шайх "кадыровцаш" олурш), шейх мансуран а, Дудаев ДжовхIаран а цIарахчу батальонийн декъехь Украинан латтанаш лардеш.