ОМОН-н белхахойх летарна таIзар дина нохчо Навальный латточу колони дехьаваьккхина
"Оцу колонехь адаман доцу хьелаш ду… Оцу цацах чекхбевллачу нехан дийцаршца, ИК-2 колони тIехь ницкъ бен, йоллу Оьрсийчоьнан федералан кхелан сацамаш кхочушбечу урхаллин (ФСИН) коррупцин система кхуллург ю, иштта "цIен зона" а олуш", - яздина шен къевлинчу инстаграм-аккаунтехь хантоьхначун гергарчо.
Оьрсийчуьра колонеш формалехь а доцуш йоькъуш ю, хьал криминалан авторитеташа тIехь терго латтон "Iаьржа" а, доллу Iедал администрацин карахь долу, цундела шога раж йолу "цIен" а. Адвокато Эйсмонт Марияс хьалхо Покровера ИК-2 колони "цIарула цIен" ю аьллера.
Навальный Алексейгахьа Москвахь Дечкен-беттан 23-чохь хIоттийначу акцехь ницкъахойх леттера Нохчийчуьра МГУ-н студент хилларг. ОМОН-н масех эскархочунна дуьхьала тийсалучу Джумаевх видео шуьйра яьржира социалан машанашкахь. Полицино лаца кхайкхийра иза. Дукха хан ялале Пачхьалкхан Думан депутата Делимханов Адама дош делира, нагахь санна, иза Оьрсийчоьнан оппозицехьа вацахь, ша Джумаевн гIуллакх "дикачу агIор луьстур ду", аьлла.
Дечкен-беттан 28-чохь студент лецира Псковн кIоштахь, хетарехь, Евросоюзан доза хадон гIертачу хенахь. Джумаевна бехкбиллира Iедалан къепан кхаа эпизодехь, Iедалан векална дуьхьал ницкъбаьккхина аьлла. 2021-чу шеран Марсхьокху-беттан I9-чохь Москварчу Тверской кIоштан кхело пхи шо хан кхайкхийра цунна юкъарчу рожан колонехь даккха. 2022-чу шеран Чиллан-баттахь сацам къобалбира Москва гIалин суьдо а.
Оьрсийчохь дIайохийначу бакъоларъяран "Мемориал" центро политикан тутмакхийн тептаре язвира Джумаев сайд-Мухьаммад.