Кадыровн критик Абдурахманов Тумсо верах лаьцна дийцина нохчийн жигархоша
Нохчийн оппозицин блогер Абдурахманов Тумсо вийна. Цунах лаьцна дуьйцу 1ADAT телеграм-канало, хаам тIечIагIбо нохчийн диаспоран хьалханчех цхьаъ волчу Масхадов Анзора.
"Цуьнан кхалхаран хьокъехь тоъал тоьшаллаш ду тхан, тIаккха цуьнан ваша Мухьаммад лерринчу сервисаша дIалачкъийна", - дуьйцу каналан хаамехь, Европерчу а, Нохчийчуьрчу а хьасташна тIе а тевжаш.
Масховдовс бахарехь, Абдурахманов масех стага вийна: "Ма-дарра дийца йиш йац сан, амма цунна герз диттина".
Амма йа Масхадовс, йа 1ADAT-о а билгал ца доккху, муьлхачу пачхьалкхехь вийна блогер.
Швецехь Абдурахманов вийна бохуш хаам гIуран-беттан 1-хь гучубелира къобалйанзачу Ичкерин агIончех волчу цхьаннан телеграм-каналехь. И хаам телеграмерчу каналашкахула баьржича, Кавказ.Реалиин редакци цхьана дийнахь-буса масийттаза Абдурахмановца а, цуьнан вешица а зIене йала гIиртира, амма кхачамбоцуш хилира и.
Уьш стенгахь бу а цкъачунна хууш дац Европехь куп тоьхначу нохчийн бакъоларйаран "Вайфонд" организацина. Швецин низамлардаран органийн официалан ресурсаш тIехь а хаам бац Абдурахманов Тумсо верах лаьцна. Швецин полицин пресс-офисехь комментари ца йира блогер вийна хиларх лаьцна болчу хаамашна.
2020-чу шеран чиллан-баттахь кIелойира Абдурахманов Тумсона Швецехь цуьнан петар чохь. Блогеран аьтто хиллера тIелеттачуьнгара герз даккха а, полици кхайкха а. Оцу гIуллакхна тIехула 2021-чу шеран дечкен-баттахь кхело таIзар кхайкхийра. Кхелйинарш бу Оьрсийчоьнан бахархой. Билггал и зулам дан кхайкхийнарш къаста ца белира, амма суьдехь кхелахочо дIакхайкхийра, "ларо Нохчийчу вуьгу" аьлла.
Абдурахманов Тумсона тIелатарх долчу гIуллакхца таIзар кхайкхийначул тIаьхьа цуьнан Германихь вехачу вешина йен кIело юкъахйаьккхира. Бакъонашларйархочо бахарехь, иза вер вовшахтохар тIедиллинера, Кадыров Рамзанан шича лоручу Эдельгериев Пахруддина.
2022-чу шеран зазадокху-баттахь Кавказ.Реалии сайто хаамбарца, Германин федералан прокуратуро Нохчийчуьра Д. Валид бехкевира Нохчийчоьнан куьйгалхочун гонерчу цхьаьннан лаамца шен махкахо вен гIортарна. Цунах лаьцна талламна тIетевжина яздира "Немецкая волна" хьосто.