ТIеман хенахь шен йохийначу хIусамах компенсаци йаларе Нохчийчуьра вахархо хьоьжу 20 шо сов ду
Нохчийчохь тIемаш боьлхучу хенахь дохийначу цIийнах Даев Iусманна дIадала Оьрсийчоьнан финансийн министраллина 1,6 миллион сом тIедожош бина сацам юхабаьккхина Нохчийчуьра Лакхарчу кхело. ГIуллакх кхин цкъа а листа дIахьажийна.
ГIуллакхан материалашца а догIуш, 75 квадратан метар йолу Даевн цIа Хилдехьарой эвлахь дара, иза дохийра 1995-2000-чу а шерашкахь тIемаш боьлхуш. ХIусам йохийна хиларх дефектан актехь а тIечIагIдина ду 2003-чу шарахь. ХIетахь комиссига кехаташ чуделлера цо компенсаци йаккха, уьш тергамза дитира цуьнан.
"Оцу юкъанна бIеннашкахь кхечу бахархошна, меттигерчу нахана, сан юьртахошна а цхьаьна, шен хеннахь компенсацеш дIайелла, суна лазаме ду, суна а, доьзална а тIехбовларна оцу коьртачу хаттарехь", - билгалдоккху Даев Iусмана искехь.
2005-чу шеран марсхьокху-баттахь Нохчийчохь йохийначу хIусамех кехаташ хIиттош хиллачу ЖКХ-н а, гIишлошйаран а Федералан агенталлин техникан тобанхоша болх сацийра, цундела дохийначу цIийнан хIусамден ницкъ ца кхаьчна компенсаци йаккха. Эххар а Даев Соьлжа-ГIалара Ленинскан кIоштан кхеле велира 2022-чу шеран гезгамашин-беттан 28-чохь, цара къобалйира цуьнан иск, 2,63 миллион сом дIадалар тIедожош. Финансийн министралло дехар дира сацам юхаэца аьлла, оцу гIуллакхехула кхозлагIа агIо - Нохчийчуьра урхалла а, Оьрсийчоьнан гIишлошйаран министралла а, МВД а юкъайало йеза аьлла. Вахархочун гIуллакх дуьххьарчу инстанцин кхеле юхаделира.
2000-чу шеран юьххьера схьа дуьйна Нохчийчохь хьалхара тIом боьдуш йохийначу шен петарна дуьхьал керла хIусам йалийта хьийза Соьлжа-ГIалара йахархо Денисултанова Зура. Европан адамийн бакъонехула йолчу кхелехь оцу гIуллакхехь толам баьккхина цо, амма Соьлжа-ГIалин мэри реза йац 20II-чу шарахь цунна хIусам ло аьлла бина сацам кхочушбан.
Дагестанан Лакхара кхело дуьхьало йина меттигерчу вахархочун Хакиев Сурупашин мехкан куьйгалхошка лакаш дехьабахарца йоьзна иск къобалйан. 1944-чу шарахь къам махках доккхучу хенахь шегара схьадаьккхинчу цIийнах компенсаци йаккха хьийжира иза. Оцу программехула 2022-2023-чу шерашна а ахча дац аьлла, дIахьедира Iедалхоша.
2000-чу шарахь Керла Алды поселкехь дуккха а нах байарна бехкзуламан гIуллакх айдайта Соьлжа-ГIаларчу Старопромыслан кIоштан кхело бина сацам Нохчийчуьра Лакхара кхело юхабаьккхира. 20 шо сов зама ю Оьрсийчоьнан бакъоларйаран органаша ца толлу, мила вара эвлана тIелетта, 60 гергга меттигера вахархо вийнарг.