Нохчийн куьйгалхочун критикна тIелатарна бехкевечунна набахтехь даккха 11 шо дехна прокуратуро
Оцу гIуллакхна тIехула рогIера кхеташо дIайаьхьна Мюнхенера Лакхарчу лаьттан кхелехь, йаздо Spiegel гIирсо. Прокуратурин векало тIедожийна Дадакаевна бехк билла "сийсазен стимулца" кIелойарна а, ницкъбан кечам барна а, герзах лаьтта низам дохорна а. И тIечIагIдина Абдурахмановс ша а.
Ишта Германин прокуратуро тоьшалла дина кхелехь, бакъоларйархо "вен кхачийнарг" Нохчийчуьра куьйгалхочун Кадыров Рамзанан шича вара аьлла. Хьалхо Абдурахманов Мухьаммада а дIахьедира, Эдельгириев Пахрудди вара иза аьлла.
2020-чу шеран гIуран-баттахь Германин низам лардаран органаша сацийра Абдурахманов Мухьаммадна тIелатар дар. Кху шеран мангал-баттахь Мюнхенехь оцу гIуллакхехула кхел йолийра. ФРГ-н прокуратуран хаамашца, коьртачу бехкевечунна – Нохчийчуьрчу вахархочунна Дадакаев Валидна – республикерчу ницкъахоша тIедиллина хиллера Абдурахманов вер. Талламна хетарехь, йаздора "Немцойн тулгIено", блогеран ваша ве аьлла хиллера Дадакаевс потенциале киллере А. Тамерлане, амма цо Абдурахмановга дийцина хиллера тIелатар кечдарх лаьцна.
Мекленбург-Передняя Померания Конституцин латта лардаран Урхаллин белхахо хилла Дадакаевна гIо деш, хIинца и даржах ваьккхина, чIагIдо немцойн Sueddeutsche Zeitung зорбано. Цуьнан баккъала йолу цIе йуьйцуш йац, амма кхелехь кхечу цIарца дакъалоцу цо – "Петер Граф".
Абдурахмановн версица, йукъалеларг карийнера Эдильгириев Пахруддина, Германихь веха Дадакаев, цуьнга ахча дIаделла а хиллера цо. Шена тIедиллинарг кхочушдан Макаровн тапча эцнера Дадакаевс шен гергерачу стагера, Цакаев Романера. Иза вевзаш ву, 2019-чу шарахь Абдурахманов Тумсо аьшнашвеш видео дIайазйина хиларца. Къайлах герз Германи дехьадаьккхинера Дадакаевс.
Стохка марсхьокху-баттахь Германин Iедалш реза хилира Абдурахманов Мухьаммадна тховкIело йаларх хаттар йухалиста. Абдурахмановна мухIажаран статус йала цуьнан дехарехь "керла тоьшаллаш"дац аьлла, цунна хьалхо кхел тIетевжинера.