"Харцахьа лелара" аьлла шен зуда йийна Къилбаседа ХIирийчуьра эскархо маьрша витина
ТаIзарехь йаздарехь, 2013-чу шарера схьа дуьйна контракт дина эскаран гIуллакх дечу Битаровс стохка стигалкъекъа-баттахь шен хIусамнана Эмма йийра. Къилбаседа ХIирийчуьра Моздок гIалахь динера цо и зулам, билгалдоккху "Кавказский узел" ресурсо. Апелляцин латкъамехь цуьнан гергарчара билгалдоккху, бехкевечо даим а кеп-кепара дуьйцура ша динчух лаьцна.
Йуьхьанца дIахьедира цо, шен хилла хIусамнана шена тIелеттера, ткъа ша, цунна дуьхаьло йеш, урс тоьхнера аьлла. ТIаьхьа Битаровс дIахьедира, цхьа диктофон аудио йара шегахь, ша йийнарг "харцахьа лелаш" хиларх тоьшалла ден, и бахьанахь кхетамах тиллачу ша йийра иза аьлла. Йийнарг "харцахьалеларх" тоьшалла, аудио а санна, кхеле ца кхачийра.
"Кхело тоьшаллийн мах хадош нийсо цалелийна, гIуллакхан йистйалар кхелахойн интересехь ду бохуш апелляцин латкъамашкахь чIагIдинехь а, кхелахойн коллегина хета, тешалла доцуш, кхелан кхеташонехь листинчу бехкзуламан гIуллакхн материалашца а бIостане ду аьлла и дIахьедарш", - аьлла, жамIаш дира Къилбан гонашкарчу тIеман кхело, иштта шаьш бина сацам хийцаза битина.
Апелляци чекхйелира мангал-бутт бовш, амма сацамах а, зулам муха дина ду а хIинцца бен хиъна дац.
Къилбаседа Кавказехь кест-кеста хуьлучух ду доьзалехь ницкъбар. Меттигерчу бахархошна тIехь гIело хьоьгу церан хIусамдайша а, доьзалера кхинболчара а. Даим а санна, полицино тергамза дуьту оцу тайпа гIуллакхаш, ткъа бехкзуламан гIуллакх дуьхьал айдина меттиг нислахь, мел а кIезиг хенаш йетта.
Къилбаседа Кавказехь "сий лардеш" нах байарх "Правовая инициатива" проекто бинчу талламо гайтарехь, 2008-чу шарера 2017-чу шаре кхаччалц схьа 39 адам дийна, царех кхоъ борша стаг вара. Бакъоларйархойн хаамашца, дукха хьолахь дойу марехь доцу зудабераш, йа марера цIабаьхкина кегий зударий, цхьа наггахь нисло цаьрца марехь берш а. Дайша, вежарша, хIусамдайша, девежарша бойу уьш.
Къилбаседа Кавказехь хIусамехь ницкъбар шен специфика йолуш ду: меттигерчу бахархошлахь цIийндайша зударшна йеттар диллина йемалдеш дац, доьзал боьхначул тIаьхьа наношна бакъо ца ло бераш лелон, ламасташна а, кхелашна а тIетийжаш. Ткъа гIелонах бевддарш полици тIаьхьа а йоккхий, йухабуьгу. Кавказ.Реалиин корреспонденто къамел дира хIусамехь ницкъ бина, пачхьалкхера йада дезначу кхаа зудчуьнца. Ишта бакъоларйархочуьнца а, юристаца а къамел дира – вадар доцург, кхин хIумма а дуй царна шайн бакъонаш ларйан дуьйсуш аьлла.