Մեզ համար օրակարգային չէ հարցը` ի վերջո օգնո՞ւմ ենք, թե՞ դեմ ենք իշխանությանը. մենք հետևողական պայքարելու ենք ՀՀ շահերի համար. Մանե Թանդիլյան
«Ելք» խմբակցության պատգամավոր Մանե Թանդիլյանը Tert.am-ի հետ զրույցում բամբասանք որակեց մամուլի այն հրապարակումները, թե «Ելքը» ԵԱՏՄ-ից դուրս գալու նախաձեռնությունն է հեղինակում, զուգահեռ իր որոշ անդամներով Մոսկվայում հանդիպումներ ունենում ռուսաստանյան «գորշ կարդինալների» հետ: Թանդիլյանը պահանջեց, որ եթե բամբասանք չէ, նման հրապարակմանը զուգահեռ անուն–ազգանուններ նշվեն և հավելեց, որ ակնհայտ է, որ կան մարդիկ, որ ամեն կերպ փորձում են վարկաբեկել իրենց՝ ԵԱՏՄ-ից դուրս գալու նախաձեռնությունը: Ինչ վերաբերում է հարցին, թե ԵԱՏՄ թևից ուղղակի բռունցքներով հարվածներ ստանալուց բացի, շատերը նրանց մեղադրում են, որ արջի ծառայություն են մատուցում նախագահական նստավայրին՝ հարցը մտցնելով օրակարգ, Թանդիլյանը նշեց. «Կառաջարկեի այդ վայ վերլուծաբաններին նստել և իրար հետ բանավիճել, ի վերջո մենք օգնո՞ւմ ենք, թե՞ դեմ ենք իշխանությանը, դա մեզ համար օրակարգային հարցը չէ»:
-Տիկի՛ն Թանդիլյան, մամուլն անդրադարձել էր, որ մինչ «Ելքը» ԵԱՏՄ-ից դուրս գալու նախաձեռնությունն է հեղինակում, փաստորեն, որոշ անդամներ Մոսկվայում հանդիպումներ են ունենում ՌԴ կառավարության անդամների հետ, այսպես ասած, «ռուսաստանյան գորշ» կարդինալների հետ: Ինչպե՞ս կմեկնաբանեք:
-Ես նման նյութերը հրապարակողներից ակնկալում եմ հրապարակել անուն և ազգանուն, որովհետև բամբասանքի մակարդակով տեղեկատվությունն այլևս հանրությանը հետաքրքիր չէ: Ես արհամարհանքով եմ վերաբերվում նման տեղեկատվությանը, որը որևէ փաստ, որևէ անվանում, իրականությանը համապատասխանող որևէ բան չի պարունակում: Ընդամենը որևէ մեկի միտք, ենթադրություն, ցանկություն չի կարող լինել մեր մեկնաբանության առարկա: Ես ակնկալում եմ դրա հետևում կանգնած մարդկանց անուններ:
-Արտաշես Գեղամյանի հարձակումը Նիկոլ Փաշինյանն ընդունեց որպես քաղաքական մարտահրավեր՝ ասելով, որ այդ մարտահրավերն ընդունում են: Կան տեսակետներ, որ Գեղամյանը ԵԱՏՄ-ական հուժկու պատասխան տվեց «Ելք»–ին` այլ մարդկանց դժգոհություններն արտահայտելով: Համաձա՞յն եք նման դիտարկմանը:
-Բոլորին է հայտնի, որ Արտաշես Գեղամյանը թե՛ ԵԱՏՄ-ի, թե՛ ՌԴ-ի անվերապահ ջատագովն է, և այս պոռթկումը, հետո հենց իր իսկ մեկնաբանությունը, երբ կապ չուներ թեմայի հետ, երբ խոսում էր ԵԱՏՄ-ի մասին, քննարկում և այլն, ցույց է տալիս փաստարկների բացակայությունը և բնածին զայրույթը պարոն Գեղամյանի մոտ, քանի որ ինքն այդ կառույցի ջատագովներից է, և դա գիտեն բոլորը: Կարծում եմ`նմանատիպ դրսևորումներն ուղղակի ցույց են տալիս իրենց վերաբերմունքը, հետևաբար դա միջոց է այդ խմբակցության կողմից ցույց տալու, թե ինչ անհանդուրժող են այն առաջարկների նկատմամբ, ինչ «Ելք»–ը նախաձեռնում է: Ակնհայտ է, որ կան մարդիկ, որ ամեն կերպ փորձում են վարկաբեկել մեր նախաձեռնությունը, իսկ իրականությունն այն է, որ այդ նախաձեռնությունը լինի փաստարկված, առաջ նայող առաջարկ, որովհետև մենք գտնում ենք, որ ՀՀ ինքնիշխանության պահպանումը կապ ունի նաև ԵԱՏՄ-ից դուրս գալու և այլ տեսլականով շարժվելու հետ:
-Մյուս կողմից` եթե ուղղակի բռունցքներով հարվածներ եք ստանում, պայմանական ասած, ԵԱՏՄ թևից, ապա մյուս թևից էլ շատերը նորից շարունակում են Ձեզ մեղադրել, որ արջի ծառայություն եք մատուցում նախագահական նստավայրին՝ հարցը մտցնելով օրակարգ: Փաստորեն, բոլոր կողմերից ակնարկները շարունակվում են:
-Ես կառաջարկեի այդ վայ վերլուծաբաններին նստել և իրար հետ բանավիճել։ Ի վերջո, մենք օգնո՞ւմ ենք, թե՞ դեմ ենք իշխանությանը, դա մեզ համար օրակարգային հարցը չէ, մենք այդ մասին չենք խոսում, քննարկում, մենք ունենք մեր օրակարգը և հետևողականորեն պայքարելու ենք ՀՀ շահերի համար:
- Տիկի՛ն Թանդիլյան, հրապարակվեցին սոցհարցումներ, որ մեր հասարակությունը շատ եվրոպամետ է դարձել, ավանդական ռուսամետությունը վերացել է: Ինչո՞ւ խորհրդարանի պատերից դուրս չփորձեցիք հարցումները տեղափոխել և միավորվել այլ ուժերի հետ` հաշվի առնելով, որ առանձին –առանձին ուժեր կան, որոնք նույնպես գտնում են, որ ԵԱՏՄ-ն մեզ ոչ մի բան չի տվել: Ի վերջո, հիմա ստացվում է, որ դա «Ելք»,–ի մենաշնորհային նախաձեռնությունն է:
-Նախ` մենք մինչև նախաձեռնությունը ինքներս շփվել ենք հանրության հետ, և նույն հարցումներով հրապարակված թվերն ընդամենն ապացույց են, որ մեր շփումներն արտացոլում են իրողությունը և մեր հանրությունն արդեն զգալիորեն գիտակցում է, որ ԵԱՏՄ-ն, ըստ էության, վնասել է ՀՀ-ին, շահեկան չէ այստեղ գտնվելը ՀՀ-ի համար։ Իրականում պետք էր Ասոցացման համաձայնագիրը կնքել և շարժվել առաջ: Այդ հարցումներն ընդամենը հաստատեցին մեր տեսակետը և շփումները հանրության հետ: Դա ցույց է տալիս, որ մեր օրակարգն առկա է հանրության մեջ և այն հարցը, թե ինչու չենք համագործակցում... Իրականում մենք բաց ենք եղել և որևէ մեկը չի կարող մեզ մեղադրել, որ մենաշնորհել ենք, այդ առումով համագործակցում է եղել, նախկինում փորձեր են եղել, մենք որևէ կերպ չենք ասել, որ դա «Ելք»–ի նախաձեռնությունն է: Իսկ այն, որ դա խորհրդարանում «Ելք»–ն է առաջ տանում, դա բնական է, մենք ուզում ենք այդ ուժերի մոբիլիզացիան և հանրության կողմից աջակցություն:
-Դուք ի՞նչ եք արել այդ ուժերին մոբիլիզացնելու համար։ Տեսեք` ասում եք, որ բաց եք, իսկ ինչ քայլեր եք արել:
-Մենք բարձրաձայնել ենք, որևէ մեկը չի կապվել ու ասել`եկեք միավորվենք։ Բոլորին է հայտնի, թե մեկ խորհրդարանական ուժը ինչ պետք է անի, և մենք դա արել ենք։ Եթե կա առաջարկ, մենք պատրաստ ենք միանալ և առաջ շարժվել: Մենք տեսնում ենք, որ մեզ հետ համաձայն են, չի նշանակում, որ նրանք պատրաստ են այդ գործը միասին առաջ տանելու: Դրա համար ենք ասում` բաց ենք և անում ենք հնարավորն, ինչ կարող ենք:
- Խորհրդարանում նախաձեռնությունը մերժվեց։ Դուք Ձեր տեսակետը պատրաստվո՞ւմ եք վերածել ենթանախաձեռնությունների, այլ հարթության վրա տանել:
-Չեն մերժել, դեռ ունենք որդեգրած ռազմավարություն և այդ քայլերով գնալու ենք: Ունենք խորհրդարանական լսումներ և, ի վերջո, փորձագետների կարծիքները ևս փաստարկված կլինեն: ԵԱՏՄ-ից դուրս գալու հարցը նորից մտնելու է ԱԺ, որովհետև կա ընթացակարգ և դրանով էլ շարժվում ենք։ Այդ առումով` այնպես չէ, որ ավարտվել է: Ինչ վերաբերում է Շարմազանովի հայտարարությանը, դա նշանակում է, որ ՀՀԿ-ն, որն այսօր իշխող կուսակցություն է, անելիք չունի և դրանով փաստում է, որ անզոր է եղել ՀՀ-ի պաշտպանությունն և անվտանգությունը կազմակերպել։ Եվ դա բարձրաձայնվում է ԱԺ ամբիոնից: