Պոլսո Հայոց պատրիարքի տեղապահ Գարեգին Բեկչյանը պատասխանել է պնդումներին, թե ինքը թուրքական իշխանությունների կողմից նախընտրելի թեկնածու չէ
Պոլսո Հայոց պատրիարքի տեղապահ Գարեգին արքեպիսկոպոս Բեկչյանը պատասխանել է Ամերիկայի Արևելյան Թեմի Առաջնորդ Խաժակ Արքեպիսկոպոս Պարսամյանին, ով ավելի վաղ հայտարարել էր, թե Բեկչյանը թուրքական պետության կողմից պատրիարքի նախընտրելի թեկնածու չէ:
Ինչպես գրում է Ստամբուլի հայկական պարբերականներից «Ակօսը», Պարսամյանն ավելի վաղ պոլսահայ «Ժամանակ» պարբերականի հետ զրույցում նշել էր, որ պատրիարքի ընտրությունների կազմակերպման ամբողջ գործընթացը պետք է ղեկավարվի պետության հետ փոխհամաձայնեցված կերպով և այս առումով Բեկչյանը սխալներ է գործում՝ հաշվի չնստելով Թուրքիա պետության հետ: Ըստ Պարսամյանի՝ Բեկչյանը թուրքական պետության համար պատրիարքի նախընտրելի թեկնածու չէ և Պոլսո Հայոց պատրիարքության գլուխն անցնելու համար հարմար անուններ գտնելու համար նախ պետք է հարցնել իշխանություններին:
Դրան ի պատասխան արքեպիսկոպոս Բեկչյանը պատասխանել է, որ իրենց վարած նախընտրական գործընթացում մեր եկեղեցական ավանդույթներին հակասող որևէ սխալ քայլ չի արվել և ինքն այս հարցում պետք է հարցնի միայն ժողովրդի նախընտրությունը:
«Եթե ժողովուրդը ցանկանա՝ կշարունակեմ աշխատանքս նրանց համար, եթե ոչ՝ կհեռանամ: Այստեղ համայնքում քաոս չկա, հակառակը՝ խաղաղություն կա հիմա և դա անհանգստացնում է որոշ մարդկանց», - ասել է Բեկչյանը:
Նա նաև քննադատել է Պարսամյանին՝ շեշտելով, որ վերջերս տարիներ շարունակ չի այցելել Ստամբուլ և չի կարող իմանալ այստեղի զարգացումները: Ըստ Բեկչյանի՝ ԱՄՆ-ից նման մեկնաբանություններ անելը ճիշտ չէ:
Նշենք, որ Պոլսո պատրիարք Մեսրոպ Մութաֆյանը կոմայի մեջ է գտնվում 2008թ.-ից և փաստացի չի կարող կատարել պատրիարքի իր լիազորությունները։ Նրա փոխարեն այդ լիազորությունները կատարում էր Արամ արքեպիսկոպոս Աթեշյանը, որն ընտրված էր ոչ թե համայնքի, այլ պետության կողմից:
2016թ.-ի հոկտեմբերի 26-ին Պոլսո Հայոց պատրիարքարանը հայտարարել է պատրիարք Մեսրոպ Մութաֆյանին անգործունյա ճանաչելու որոշման մասին, ինչը ենթադրում է նոր պատրիարքի ընտրության մեկնարկ, որի համար անհրաժեշտ էր նախ ընտրել Պոլսո Հայոց պատրիարքի նոր տեղապահ, որը կղեկավարեր ընտրական գործընթացը:
2017թ.-ի փետրվարին Էջմիածնում կայացված որոշման համաձայն՝ մարտի 15-ին Ստամբուլում տեղի ունեցավ Պոլսո Հայոց պատրիարքի նոր տեղապահի ընտրություն: Ընտրություններում Արամ արքեպիսկոպոս Աթեշյանին հաղթած Գարեգին արքեպիսկոպոս Բեկչյանը, չնայած Աթեշյանի ու պետության կողմից միջամտություններին, ստանձնեց Պոլսո Հայոց պատրիարքի տեղապահի պաշտոնը և արդեն ձեռնամուխ է եղել պատրիարքական ընտրությունների կազմակերպմանը։