ՏԻՄ ընտրություններից հետո ՀՀԿ-ն կպահպանի ու կավելացնի իր ներկայությունը Տեղական ինքնակառավարման մարմիններում. Է. Շարմազանով
Հանրապետական կուսակցություն նոյեմբերի 5-ին կայանալիք ՏԻՄ ընտրությունների 60 համայնքում ունի իր թեկնածուներին: Այսօր ՀՀԿ Գործադիր մարմնի նիստի ավարտից հետո լրագրողների հետ հանդիպմանը նման հայտարարություն արեց ՀՀԿ խոսնակ, ԱԺ փոխնախագահ Էդուարդ Շարմազանովը: Նա տեղեկացրեց, որ այս պահին դրությամբ ԲՀԿ-ն ունի 6 թեկնածու, ՀՅԴ-ն 3 թեկնածու, ինչպես նաև կան 39 անկուսակցական թեկնածու:
«Ինչպես տեսնում եք քաղաքական մրցակցությունն այդքան էլ մեծ ներկապնակ չունի, քանի որ մասնակցում են հիմնականում 2 կուսակցություն, որոնք ունեն կոալիցիոն հարաբերություններ, և մեկ ընդդիմադիր կուսակցություն: ՀՀԿ-ն դրական է գնահատում այն ընթացքում իր թեկնածուների քարոզարշավը, որևէ լուրջ, անօրինական գործողություններ չեն եղել»,- ասաց նա:
Շարմազանովը կարծում է, որ նոյեմբերի 5-ի կայանալիք ՏԻՄ ընտրություններից հետո ՀՀԿ-ն կպահպանի ու կավելացնի իր ներկայությունը տեղական ինքնակառավարման մարմիններում: ՀՀԿ խոսնակը շեշտեց, թե ԳՄ նիստում քննարկման են դրվել բոլոր այն հարցերը, որոնք այս օրերին եղել են հանրության ուշադրության կենտրոնում:
Հիշեցնենք, որ 2017 թվականի նոյեմբերի 5-ին տեղական ինքնակառավարման մարմինների հերթական ընտրություններ են անցկացվելու Արագածոտնի, Արարատի, Արմավիրի, Գեղարքունիքի, Լոռու, Կոտայքի, Շիրակի, Սյունիքի, Վայոց ձորի և Տավուշի մարզերի թվով 66 համայնքներում, իսկ Արարատի մարզի Արտաշատ, Լոռու մարզի Շիրակամուտ և Սյունիքի մարզի Գորիս համայնքներում անցկացվելու են արտահերթ ընտրություններ: Նշված համայնքներից 15-ում կայանալու են միայն համայնքի ղեկավարի, 17 համայնքում` միայն ավագանու անդամի, և 37 համայնքում միաժամանակ անցկացվելու են համայնքի ղեկավարի և ավագանու անդամի ընտրություններ:
Նշենք նաև, որ ՏԻՄ ընտրություններին մասնակցում են ՀՀԿ-ն, ՀՅԴ ու ԲՀԿ: