Թուրք գործարար, Հայաստանի հետ հարաբերությունների կարգավորման ջատագով Օսման Քավալայի կալանքի ժամկետը երկարաձգվել է
Թուրքիայում ձերբակալված հայտնի գործարար, բարերար Օսման Քավալայի կալանքի ժամկետը երկարաձգվել է ևս 7 օրով։
Այս մասին հաղորդում է Horizon Weekly-ն՝ հիշեցնելով, որ երկրի պատմության մութ էջերի մասին բարձրաձայնող առաջատար դեմքերից համարվող Քավալային ձերբակալել էին հոկտեմբերի 19-ին Ստամբուլի Աթաթուրքի անվան օդանավակայանում: Նրա նկատմամբ նախնական 7 օրվա կալանք է սահմանվել:
Նրա փաստաբանի խոսքով՝ Քավալային տեղափոխել են ահաբեկչական գործերի քննությամբ զբաղվող ոստիկանական բաժանմունք՝ գաղնի հետաքննության շրջանակներում:
Նշվում է, որ Քավալային կասկածում են երկրից արտաքսված իսլամական քարոզիչ Ֆեթուլլահ Գյուլենի հետ առնչություն ունենալու և անցյալ տարի Թուրքիայում տեղի ունեցած ռազմական հեղաշրջման փորձին ներգրավված լինելու մեջ:
Հիշեցնենք, որ նախօրեին Քավալային ազատ արձակելու մասին կոչով Թուրքիայի իշխանություններին դիմել էր խորհրդարանի հայազգի պատգամավոր Կարո Փայլանը:
Քավալայի «Անադոլու Քյուլթուր» հիմնադրամը 2002 թվականից ի վեր քայլեր է ձեռնարկում Հայաստանի հետ հարաբերությունները բարելավելու ուղղությամբ: