Հայաստանը զրկված է այլընտրանքային տարբերակներից, ինչի հետևանքով ամեն տարի գազի գնի թանկացման վտանգի առաջ ենք կանգնած. Մանե Թանդիլյան (տեսանյութ)
ՌԴ վարչապետ Դմիտրի Մեդվեդևի հայտարարությունը, որ ռուսական գազը Հայաստանի համար չի թանկանա 2018թ.-ին, բացահայտեց այն ամբողջ կեղծիքը, որը կար գազի գնի հետ կապված:
Tert.am-ի հետ զրույցում այս մասին ասաց «Ելք» խմբակցության պատգամավոր Մանե Թանդիլյանը:
«Իշխանությունները գազի գնի շուրջ բանակցությունները ներկայացնում էին որպես մի կարևոր դրույթ, որի պատճառով Հայաստանը, ըստ էության, միացավ Եվրասիական տնտեսական միությանը, որովհետև ասվում է, որ Ռուսաստանը միակ երկիրն է, որտեղից Հայաստանը գազ է գնում, և հենց այդ պատճառով էլ մենք ԵԱՏՄ-ում ենք, որովհետև ուզում ենք այս տեսանկյունից ապահովել մեր անվտանգությունը»,- ասաց Մանե Թանդիլյանը:
Պատգամավորի խոսքով՝ կողմերը վավերացրել էին «Գազային պայմանագիր», որով Հայաստանը պարտավորվել էր միայն Ռուսաստանից գազ գնել, ուստի «շանտաժը ժողովրդի գլխին կախված է լինելու, քանի դեռ այլընտրանքային էներգակիր չունենք»:
«Մյուս կողմից էլ այլընտրանքներ չենք կարող ունենալ, որովհետև պարտավորվել ենք իրենցից գնել: Դրա համար էլ Մեդվեդևն ասում է, որ 2018թ.-ին գազի գինը չի թանկանա, մատուցում են սա որպես բարի կամք, այնինչ մեր գլխին կանգնած է գազի գնի ամենամյա թանկացման խնդիրը: Սա շատ վտանգավոր է: Մենք զրկված ենք ալտերնատիվ տարբերակներից, ինչի հետևանքով էլ, այո, ամեն տարի գազի գնի թանկացման վտանգի առաջ ենք»,- ասաց Մանե Թանդիլյանը:
Մանրամասները՝ տեսանյութում: