«Արսենալ»-ը Շվեդիայում խոշոր հաշվով հաղթեց «Էսթերսունդ»-ին. Մխիթարյանը կրկին աչքի ընկավ
ՈւԵՖԱ-ի Եվրոպայի լիգայի մրցաշարի 1/16-րդ եզրափակիչի առաջին խաղում հինգշաբթի երեկոյան Լոնդոնի «Արսենալ»-ը Շվեդիայի Էսթերսունդ քաղաքում հյուրընկալվեց համանուն ակումբին և հաղթեց խոշոր՝ 3:0 հաշվով:
Հայաստանի հավաքականի ավագ Հենրիխ Մխիթարյանը «Արսենալ»-ի մեկնարկային կազմում էր և իր նպաստն ունեցավ թիմի հաղթանակում: Հանդիպման հաշիվը 13-րդ րոպեին բացեց Նաչո Մոնրեալը, 24-րդ րոպեին Մխիթարյանի փոխանցումից հետո գնդակը դիպավ «Էսթերսունդ»-ի ֆուտբոլիստին և հայտնվեց շվեդական թիմի դարպասում, իսկ 58-րդ րոպեին Մխիթարյանի փոխանցմամբ Մեսութ Օզիլը երրորդ գնդակը խփեց:
Պատասխան հանդիպումը Լոնդոնում կկայանա փետրվարի 23-ին:
Հունվարի 22-ին «Մանչեսթր Յունայթեդ»-ից «Արսենալ» տեղափոխված Հենրիխ Մխիթարյանը չորրորդ խաղն անցկացրեց լոնդոնյան ակումբում և երրորդը՝ թիմի մեկնարկային կազմում:
Հիշեցնենք, Հայաստանի հավաքականի ավագը արդեն դարձել է Եվրոպայի լիգայի հաղթող՝ անցած տարի «Մանչեսթր Յունայթեդ»-ի կազմում, Ամստերդամի «Այաքս»-ի հետ եզրափակիչ խաղում նա դարձավ երկու անպատասխան գոլերից մեկի հեղինակը: