Մարդու և պաշտոնյայի անփոխարինելիության տարանջատման ընկալումն ունենալու համար ներկա հանրապետական վերնախավին առնվազն 200 տարի է պետք. Միքայել Հայրապետյան
Ցանկացած Մարդ է անփոխարինելի. խնդիրն այն է, որ որևէ պաշտոնյա անփոխարինելի չէ, այդ թվում՝ Ս. Սարգսյանը՝ որպես պաշտոնյա։
Այս մասին Tert.am-ի հետ զրույցում ասաց Պահպանողական կուսակցության նախագահ Միքայել Հայրապետյանը։ «Մարդու և պաշտոնյայի տարանջատման այս տարրական ընկալումն ունենալու համար ներկա հանրապետական վերնախավին առնվազն երկու հարյուր տարի է պետք»,- նշեց նա։ Միքայել Հայրապետյանի կարծիքով՝ պետության սոլիդության դիրքերից՝ ցանկալի է, որ հենց նա կոչվի վարչապետ, ում ձեռքում գտնվելու է իրական իշխանությունը։
-2015 թ. սահմանադրական փոփոխություններից հետո Հայաստանը առաջիկա ամիսներին ամբողջովին անցնելու է կառավարման խորհրդարանական համակարգի: ԱԺ-ն արդեն ՀՀ 4-րդ նախագահ է ընտրել Արմեն Սարգսյանին: Նախ՝ ի՞նչ կարծիք ունեք նորընտիր նախագահ Արմեն Սարգսյան անձի և քաղաքական ֆիգուրի մասին: Նա ի՞նչ կարող է փոխել Հայաստանում:
- Նոր նախագահին թեև անձնապես ծանոթ չեմ, սակայն ելնելով նրա կենսագրական հրապարակային տվյալներից՝ ողջունելի է, որ 20-ամյա ընդմիջումից հետո ՀՀ բարձրագույն ղեկավար կազմում, հիրավի, մտավորական է հայտնվում: Բնականաբար, նա շատ ավելի լուրջ քաղաքական ֆիգուր է, քան կարելի է պատկերացնել, չարենցյան բնորոշմամբ, ռուսական ծայրագավառի մեր չափանիշերով: Պարոն նախագահը փոխել, թերևս, ոչինչ չի կարող, սակայն բարեփոխելու լիարժեք հնարավորություններ ընձեռում է իր կարգավիճակը. ամենից ակնկալելին քաղբանտարկյալների ամոթալի ավանդույթի աստիճանական վերացումն է մեր երկրից և գիտական ու կրթական կաթվածահար համակարգում ողջամտության տարր ներմուծելը:
-Ապրիլի 9-ից 16-ն ընկած ժամանակահատվածում ԱԺ խմբակցությունները պետք է առաջադրեն վարչապետի իրենց թեկնածուներին և դրանից հետո առաջիկա նիստում ընտրեն Կառավարության նոր ղեկավար: Պայքար, անակնկալներ կանխատեսո՞ւմ եք վարչապետի ընտրության ժամանակ:
- Մի քիչ բարձրագոչ է կատարվելիքն ընտրություն անվանելը, սակայն որևէ անակնկալ չի կարող լինել:
-Հանրապետականները փորձում են հասարակությանը համոզել, որ Սերժ Սարգսյանը երկրի անփոխարինելի ղեկավար է: Ըստ նրանց՝ դա է պահանջում և՛ պետական շահը, և՛ կուսակցությունը: Անփոխարինելի մարդիկ կա՞ն Ձեզ համար, ընդհանրապես, ինչպե՞ս եք վերաբերվում Սերժ Սարգսյանի հավանական վարչապետությանը: Ո՞ր աշխատանքի, ունակությունների համար Սերժ Սարգսյանը պետք է շարունակի ղեկավարել երկիրը:
- Ցանկացած Մարդ է անփոխարինելի. խնդիրն այն է, որ որևէ պաշտոնյա անփոխարինելի չէ, այդ թվում՝ Ս. Սարգսյանը՝ որպես պաշտոնյա, բայց Մարդու և պաշտոնյայի տարանջատման այս տարրական ընկալումն ունենալու համար ներկա հանրապետական վերնախավին առնվազն երկու հարյուր տարի է պետք: Քանի որ ավելի վատ լինել չի կարող, ապա ի՞նչ տարբերություն, թե իշխող կլանից ո՛ր մեկը կանվանվի վարչապետ: Իսկ պետության սոլիդության դիրքերից՝ իհարկե, ցանկալի է, որ հենց նա կոչվի վարչապետ, ում ձեռքում գտնվելու է իրական իշխանությունը: Իսկ պարոն Ս. Սարգսյանի աշխատանքի և ունակությունների մասին առավել ստույգ դատողություններ ամեն օր կարող եք լսել այն տատիկների շուրթերից, ովքեր արցունքն աչքերին վերջին անգամ համբուրում են իրենց թոռներին ու «Զվարթնոց» օդակայանից կամ Մատենադարանին հարող տարածքից դեպի անհայտություն ճամփում իրենց սիրելիներին:
- «Հանուն Հայաստան պետության» ճակատը մարտի 10-ից հանրահավաքների շարք է նախաձեռնել՝ իշխանափոխության պահանջով: Ինչպե՞ս եք վերաբերվում այս շարժմանը կամ նախաձեռնությանը, այն կարո՞ղ է հաջողություններ ունենալ:
- Ես միայն հաջողություններ կարող եմ մաղթել իրենց: