Կայացել է Հայաստանը և Վրաստանը ներկայացնող անվասայլակներով բասկետբոլի թիմերի հանդիպում (լուսանկարներ)
ՀՀ սպորտի և երիտասարդության հարցերի նախարար Հրաչյա Ռոստոմյանը ներկա է գտնվել Հայաստանի Հանրապետության արտակարգ իրավիճակների նախարարության «Արտակարգ» և Վրաստանի «Թբիլիսի» թիմերի միջև կայացած անվասայլակներով բասկետբոլի ընկերական հանդիպմանը:
Այս մասին տեղեկացնում է ՀՀ սպորտի և երիտասարդության հարցերի նախարարության պաշտոնական կայքը:
Միջոցառումը համատեղ կազմակերպել են ՀՀ սպորտի և երիտասարդության հարցերի նախարարությունը և ՀՀ արտակարգ իրավիճակների նախարարությունը՝ ՀՀ աշխատանքի և սոցիալական հարցերի նախարարության և Հայկական Կարմիր խաչի ընկերության աջակցությամբ:
Նախարար Հրաչյա Ռոստոմյանը, կարևորելով միջոցառումը, նշել է, որ սահմանափակ հնարավորություններով անձինք սպորտով մարզվելով և զբաղվելով՝ ձեռք են բերում պայքարելու և հաղթելու կամք, ինչպես նաև հնարավորություն՝ ինտեգրվելու մարզական մեծ ընտանիքին և դառնալու այդ ընտանիքի լիիրավ անդամը:
«Ուրախ եմ, որ հանդիպումը բասկետբոլային է: Ինձ համար այս փաստը զարմանալի չէ, քանի որ խաղային մարզաձևերից սահմանափակ հնարավորություն ունեցող անձանց շրջանում ամենատարածվածն ու սիրվածը հենց բասկետբոլն է»,- ասել է Հ. Ռոստոմյանը:
Նշենք, որ խաղն անցկացվել է «Մարզաձևերի զարգացման հանրապետական համալիր կենտրոն» ՊՈԱԿ-ի (նախկին «Միկա») մարզադահլիճում և ավարտվել «Արտակարգ» թիմի հաղթանակով (33:21):