Ադրբեջանցի ակտիվիստները հացադուլ են սկսել՝ բանտում գտնվող ընդդիմադիր բլոգեր Մեհման Հուսեյնովին աջակցելու համար
Ադրբեջանում և մի շարք եվրոպական երկրներում հասարակական արշավ է մեկնարկել՝ աջակցելու համար ընդդիմադիր բլոգեր Մեհման Հուսեյնովին, որը պատիժ է կրում բանտում:
Ինչպես հայտնում է DW.com-ը, լրագրողներն ու բլոգերները հունվարի սկզբից ի վեր իրենց աջակցությունն են հայտնում #FreeMehman հեշթեգի միջոցով: Հունվարի 3-ին և 7-ին Բաքվում անցկացված հանրահավաքների մասնակիցներին ցրել է ոստիկանությունը:
Հուսեյնովին ազատ արձակելու կոչով հանդես են եկել Եվրոպայի խորհուրդն ու Ֆրանսիայի ԱԳՆ-ը: «Մենք մտահոգված ենք լրագրողի շուրջ ստեղծված իրավիճակով: Հույս ունենք, որ նրա նկատմամբ նոր քրեական հետապնդումը կդադարեցվի, և նա ազատ կարձակվի»,- հայտարարել է Եվրոպայի խորհրդի մարդու իրավունքների հարցով հանձնակատար Դունյա Միյատովիչը:
2017-ին Հուսեյնովին 2 տարվա ազատազրկման են դատապարտել վարկաբեկման համար այն բանից հետո, երբ նա հայտարարել էր, որ իրեն ծեծի են ենթարկել ոստիկանությունում: Հուսեյնովի ժամկետի ավարտից երկու ամիս առաջ նրա դեմ նոր գործ է հարուցվել, որով նա մեղադրվում է բանտապահին հարվածելու մեջ: Նրան ևս 5-7 տարվա ազատազրկում է սպառնում:
Ի նշան բողոքի՝ Հուսեյնովը հացադուլ է հայտարարել, որից հետո նրա առողջությունը վատթարացել է: Սակայն հունվարի 7-ին Ադրբեջանում հայատարարել են, որ նա դադարեցրել է հացադուլը: Այսօր սոցցանցերում հայտնված տեղեկությունների համաձայն՝ Հուսեյնովին աջակցող ակտիվիստները ևս հացադուլ են սկսել: