Օր օրի պետության առջև նոր խնդիրներ են չոքում. իշխանությունը պետք է օգնի պետությանը, տեղ տա այլակարծությանը, կոնսոլիդացնի դաշտը և հաստատի հանրային համերաշխություն. Աբրահամ Գասպարյան (տեսանյութ)
Ճգնաժամը երկարելու է մինչեւ հաջորդ տարվա գարուն, հնարավոր է՝ ավելի շատ էլ: Առաջիկա տասն օրում, հավանաբար՝ մինչև արտակարգ դրության ավարտը, տնտեսական գործունեության բոլոր սահմանափակումները կհասցվեն նվազագույնի, այնուհետև՝ կվերացվեն: Ֆեյսբուքյան ուղիղ եթերում վարչապետը նաև խոսել է կոմունալ վճարների հետ կապված խնդրի, հանրային լայն դժգոհության ու տնտեսական ճգնաժամի մասին: Այս մասին «Արմնյուզ» հեռուստաընկերության «Երեկոյան լուրեր Աբրահամ Գասպարյանի հետ» հաղորդման ընթացքում ասել է Գասպարյանը։
Գասպարյանը ներկայացրել է Փաշինյանի հայտարարությունն առ այն, ճգնաժամը համաշխարհային է, եւ մեր երկիրն այդ ամենից անմասն չի կարող մնալ և որ տնտեսական խնդիրներն առավել կխորանան այն պարագայում, երբ չվճարվեն կումանալ վարձերը: «Վարչապետի այս հայտարարություններից հետո մի խումբ քաղաքացիներ բողոքի ակցիա են իրականացրել Կառավարության շենքի դիմաց, հայտարարել, որ արտակարգ դրության պայմաններում անջատել են էլեկտրաէներգիան:
Նիկոլ Փաշինյանը խոսում է մարդկանց մի շերտի մասին, որն ունենալով ֆինանսական հնարավորություն, օգտվելով առիթից, չի վճարում կոմունալներն ու ավելորդ ծանրաբեռնում է պետությանն ու էներգետիկ համակարգը: Իրականում այս հարցին բոլորս պետք է ըմբռնումով մոտենանք: Հետո ինչ որ՝ պետությունը հնարավորություն է ստեղծում կարիքավորներին օգնելու և կոմունալները ուշ վճարելու համար: Դրանից, հնարավորություն ունեցողները, չպե՛տք է օգտվեն:
Եթե Պարետատունը ասում է, որ կոմունալները կկարողանանք վճարել արտակարգ դրության ավարտից հետո, ուրեմն հրամանը պետք է պահել և ոչ թե ճանապարհի կեսից ասել՝ եթե չեք վճարում, ուրեմն կթակեն ձեր դուռն ու կանջատեն լույսն ու գազը»,- նշել է Գասպարյանը և օրինակով ներկայացրել, թե ինչ կարող է լինել, եթե մենք գիտակցաբար չմոտենանք այս հարցին: Ըստ նրա՝ կարող ենք սոցիալական լուրջ խնդիրներ առաջացնել մարդկանց այլ խմբի համար:
«Օրինակ, եթե երկրում կա, դիցուք, 100 հազար կարիքավոր, որը չի կարողանում կոմունալները վճարել, պետությունը մասնավոր հատվածի՝ տվյալ դեպքում ՀԷՑ-ի ու Գազպրոմի հետ պայմանավորվում է այդ 25 հազար ընտանիքի կոմունալները որոշ ժամանակով հետաձգելու շուրջ: Այդ ընկերություններն էլ իրենց հաշվարկներն ունեն, իրենք էլ պահում են աշխատողների, աշխատավարձ ու հարկ վճարում: Եթե կարիքավորների թիվը՝ 100 հազարը ուռճացվում է ու արհեստականորեն հասնում 200 հազարի, պետություն-մասնավոր պայմանավորվածությունը փլվում է, քանի որ ՀԷՑ-ն ու Գազպրոմն արդեն պետք է կամ գնան կրճատումների, կամ օպտիմալացման, կամ պարզապես իրենց հերթին աշխատավարձ չեն տալու, պետությանն էլ հարկեր չեն վճարելու»:
Գասպարյանի կարծիքով՝ իշխանության ներսում իրավիճակը հսկողության տակ պահելու միասնական ռազմավարություն չկա, չկա նաև տեղեկատվական համակարգված քաղաքականություն:
«Այսպես կոչված «լոքդաունը» առաջիկա օրերին թուլանալու է, ավելի ճիշտ՝ թուլացվելու է...ոչ թե իշխանության հաշվարկված ու համակարգված քայլերի շնորհիվ, այլ՝ ճգնաժամն անարդյունավետ կառավարելու պատճառով: Օր օրի պետության դռան առջև նոր խնդիրներ են չոքում: Եթե չենք ուզում այս ճգնաժամը տևի ևս մեկ տարի, պետք է օգնել պետությանը, իշխանությունն էլ իր հերթին պետք է տեղ տա այլակարծությանը, ոչ թե ձևական, այլ՝ բովանդակային: Առաջին բանը, մինչև որևէ մասնագիտական քայլ անելը, որ պետք է իշխանությունն անի՝ հանրային համերաշխություն հաստատելն է, երկրում, իրապես, մթնոլորտ փոխելը, PR ակցիաների, ժամկետանց պոպուլիստական հայտարարությունների ու քարոզչական հնարքների փոխարեն՝ դաշտը կոնսոլիդացնելը, աշխարհում սփռված հայ մասնագետների հետ խորհրդակցություններ անցկացնելը, պրոֆեսիոնալ մարդուժին ապավինելը՝ անկախ փաստից, թե նրանք որ ռեժիմի ժամանակ են աշխատել:
Քննադատությունից չպետք է խռչել: Իշխանության գործողությունը քննադատողը պարտադիր չէ, որ ռեվանշիստ լինի»,-եզրափակել է Գասպարյանը: